Qazaqstan Respýblıkasy Prezıdentiniń Jarlyǵyna sáıkes Shymkent qalasynyń úzdik pedagogi Arman Orynbekov «Qazaqstannyń eńbek sińirgen ustazy» qurmetti ataǵymen marapattaldy. Marapatty QR Bilim jáne ǵylym mınıstri Ashat Aımaǵambetov tabystady.
Arman Orynbekov - Shymkent qalasyndaǵy № 90 Daryndy balalarǵa arnalǵan mamandandyrylǵan mektep-gımnazııasynyń dırektory bolyp qyzmet atqarady. Osyǵan deıin Arman Shymbaıulynyń 80-nen astam ádistemelik-oqý quraldary jaryq kórdi.
2019 jylǵy «Úzdik pedagog» ataǵynyń ıegeri. 1999-2012 jyldar aralyǵynda qalalyq, oblystyq, respýblıkalyq pán olımpıadalarynda 21 oqýshysy; qalalyq, oblystyq, respýblıkalyq jáne halyqaralyq tarıh, quqyq, azamattaný pánderiniń konkýrstarynda, debat saıystarynda 50-ge jýyq oqýshylary júldeger atanǵan.
Sonymen qatar, mektep-gımnazııanyń oqýshylary halyqaralyq, respýblıkalyq, oblystyq jáne qalalyq deńgeıdegi ár túrli bilim, óner, sporttyq baıqaýlar men jarystarda, pándik olımpıadalar men ǵylymı jobalar jarystarynda 200-ge jýyq, ustazdary qalalyq pándik olımpıadalardan jáne ár túrli deńgeıdegi baıqaýlardan 80-nen astam júldeli oryndardy jeńip alǵan.
Shymkent qalasy ákimdiginiń baspasóz qyzmeti
