Boks degende eń aldymen «erler aınalysatyn sport» degen oı keledi. Jaına Shekerbekova bul uǵymdy joqqa shyǵaryp, sporttyń osy túrinen elimizdiń dańqyn asqaqtatqan, boksshy.
Keıipkerimizdiń sportqa qyzyǵýshylyǵy Shymkent qalasyna kelgennen bastaldy. «Femıda» zań kolledjinde oqyp júrgende boks úıirmesine baryp júrgen edi. Ol 2006 jyly Qyzyljar qalasynda ótken el birinshiliginiń jeńimpazy atandy. Sodan áýesqoı bokstyń qyr-syryn meńgerýge baryn saldy. Osydan keıin sportta juldyzy jarqyrady. 2008 jyly Almatyda ótken el chempıonatyna qatysyp, jeńimpaz atandy. Bul – Jaınanyń bokstaǵy alǵashqy, ári iri jeńisi.
Bylǵary qolǵap ıegeriniń jetistikteri jeterlik. 2010 jyly Astana qalasynda ótken Azııa chempıonatynda ózgelerden oq boıy oza shapty. 2012 jyly Qytaıda ótken Azııa kýbogy jarysynda, 2014 jyly Ońtústik Koreıada ótken Azııa oıyndarynda II oryn jeńip aldy. 2016 jyly Astana qalasynda ótken Álem chempıonatynda III oryn ıelendi. Rıo De Janeırodaǵy 2016 jyly XXXI Jazǵy Olımpıada Oıyndarynda V oryndy qanjyǵaǵa baılady. 2018 jyly Delıde (Úndistan) Álem chempıonaty uıymdastyrylyp, onda II orynǵa taban tiredi. Osy jylǵy HHHII-Jazǵy Olımpıada Oıyndaryna joldama jeńip alýǵa úmitker sportshy.
Qazaqstan Respýblıkasynyń bes dúrkin chempıony. Birneshe halyqaralyq týrnırdiń jeńimpazy. Qazaqstanǵa eńbek sińirgen sport sheberi.
Jaınanyń joǵaryda keltirgen jetistikteri sharshy alań sheberiniń jeńiske degen muqalmas jigeriniń arqasy. Soqqysy joıqyn, tehnıkasy jetik sportshynyń qaı kezde de tuǵyry bıikte.
Shymkent qalasy ákimdiginiń baspasóz qyzmeti
