Búginde elimizde azamattyq alý úshin 48 qujat jınaý kerek. Májilis depýtaty Qazybek Isa Qazaqstan azamattyǵyn alǵysy keletin qandastar úshin qujat sanyn qysqartyp, ony birden berýdi usyndy, dep habarlaıdy «Adyrna» ulttyq portaly inbusiness.kz tilshisine silteme jasap.
Depýtat tarıhı otanyna oralǵysy keletin qandastar azamattyq alýda qıyndyqqa tap bolatynyn ashyq aıtty. «Reseı, Izraıl jáne taǵy basqa elderde azamattyq alý úshin bir ǵana qujat talap etiledi, al halqy óte az Qazaqstanda 48 qujat jınaý kerek. Bizde de ulty qazaq qandastar úshin kerek qujat sanyn barynsha shektep, birden azamattyq beriletin bolýǵa tıis», – dedi Qazybek Isa Májilistiń jalpy otyrysynda.
Onyń aıtýynsha, sońǵy ýaqytta Qazaqstan azamattyǵyn alý óte qıyndap ketken. «Taǵy bir úlken kedergi – sheteldegi qazaqtardyń ózderiniń qazaq ekenin dáleldeýi. Ony qujat júzinde rásimdeý eń basty máseleniń biri bolyp otyr. Sondyqtan «etnıkalyq qazaq» ekenin dáleldeıtin qujatty berý mehanızmin durys jolǵa qoımasaq, az ýaqytta kóp qandasymyzdy «joǵaltyp alý» qaýpi týady», – dedi Qazybek Isa. Sonymen qatar ol Qazaqstan úshin halyq sanynyń kóbeıýi mańyzdy ekenin atap ótti. Onyń aıtýynsha, shet elderde 7 mln-ǵa jýyq qazaq turady. Bul – Qazaqstan halqynyń 38%-y. «Bul demografııalyq aspektide qazaq úshin bul úlken áleýet. Qazir Qazaqstanǵa qonys aýdarýǵa yntaly sheteldik qazaqtardyń sany 1,5 mln adamǵa jýyqtaıdy. Osy adamı resýrsty biz nege durys paıdalanbaımyz?», – dedi depýtat.
Onyń aıtýynsha, 1993-2021 jyldar aralyǵynda qandastarǵa bólingen kvota 100 esedeı azaıyp ketken. «1993 jyly el bolyp, esimizdi jıyp, etegimizdi jaýyp jatqanda 60 myńdaı, 2010 jyly 100 myńnan asa adam qabyldaǵan Qazaqstan Táýelsizdiginiń 30 jyldyǵynda 1426 adamǵa ǵana kvota bólgen. Bul burynǵy mejeden 100 esedeı tómen. Mundaı antı-rekordqa jetetindeı basymyzǵa ne kún týdy?», – dedi Qazybek Isa. Ol kvotanyń azaıýyn Kóshi –qon agenttiginiń joıylyp, mıgraııamen aınalysý ár mınıstrlikke, kvotaǵa usynys berý ár oblys ákimshiligine berilgeninen bolyp otyr degen pikirde. «Sondyqtan búginde ár mınıstrlikke shashyrap ketken basqarmalardy bir organǵa jınap, Demografııa jáne kóshi-qon jónindegi Agenttikti qaıta qurý kerek. Qandastardy eldiń soltústigine qonystandyrý qajet. Bul óńirlerdegi aýyldarda bos qalǵan úılerdiń baǵasy 200-500 myń teńge», – dep túıindedi sózin depýtat.
