Qazaqstanda Özbekstan azamaty, Maqsūt Närıkbaev atyndaǧy universitettıŋ būrynǧy oqytuşysy İkboljon Koraboev tyŋşylyq jasady degen aiyppen 10 jylǧa bas bostandyǧynan aiyryldy, dep habarlaidy “Adyrna”.
“Azattyq Aziia” basylymnyŋ mälımetınşe, 46 jastaǧy ǧalymǧa qatysty sot prosesı ıs materialdarynda qūpiia aqparattyŋ boluyna bailanysty jabyq ötken. Onyŋ tuystary ükım turaly resmi organdardan emes, öz derekközderı arqyly bılgen.
İkboljon Koraboev 2026 jylǧy 3 şıldede Astanada ūstalǧan. Ol Maqsūt Närıkbaev atyndaǧy universitette halyqaralyq qatynastar pänınen sabaq bergen. Ǧalymǧa Qazaqstan Qylmystyq kodeksınıŋ 176-baby, iaǧni «Tyŋşylyq» boiynşa aiyp taǧylǧan. Atalǧan bapta 10 jyldan 15 jylǧa deiın bas bostandyǧynan aiyru jazasy közdelgen.
Tuystarynyŋ aituynşa, ǧalymnyŋ qandai memlekettıŋ müddesıne jūmys ıstegenı jäne sotta qandai dälelder ūsynylǧany turaly otbasyǧa aqparat berılmegen. Sondai-aq olarǧa tergeu jäne sot materialdarymen tanysuǧa, ükımnıŋ köşırmesın aluǧa mümkındık jasalmaǧan.
Koraboev aimaqtyq integrasiia, geoekonomika jäne Ortalyq Aziianyŋ strategiialyq maŋyzy bar mineraldyq resurstaryn zerttegen. Ärıptesterınıŋ sözınşe, ol ǧylymi eŋbekterınde aşyq derekközderdegı aqparatty paidalanǧan.
Ǧalymnyŋ otbasy Qazaqstannyŋ prezidentıne, Bas prokuraturaǧa, Ūlttyq qauıpsızdık komitetıne jäne ombudsmenge ötınış joldaǧan. Olar sot ükımıne apelliasiialyq şaǧym tüsırıp, ıstı qaita qaraudy, professordyŋ qūqyqtary men bedelın qalpyna keltırudı talap etıp otyr.
Äzırge Qazaqstan men Özbekstannyŋ resmi organdary sot ükımıne qatysty tüsınıkteme bergen joq.
Aita keteiık, būǧan deiın QazTAG Ūlttyq qauıpsızdık komitetınıŋ jauabyna sılteme jasap, Qazaqstan tarapy Koraboevtıŋ ısı turaly Özbekstanǧa resmi türde habarlaǧanyn jazǧan edı.
