Memleket basshysy Qasym-Jomart Toqaevtyń Jarlyǵymen 2019 jyly tuńǵysh ret muǵalim mártebesi týraly zańnyń qabyldanýy ustazdar qaýymyn bir serpiltip tastady. Bul – sapaly bilim berý isin jetildirýge arnalǵan qadam. Zańda eń basty másele pedagogtardyń quqyqtaryn keńeıtý jáne muǵalimge degen júktemeni azaıtý, olardy qatysy joq jumystardan bosatýǵa, tek qana ózin-ózi damytý arqyly shyǵarmashylyqpen aınalysýǵa múmkindik berýge baǵyttalǵan.
Elimizde jarty mıllıonnan asa muǵalim bar eken. Qazaqtyń ǵulamasy, birtýar ustazy Ahmet Baıtursynov: «Muǵalim qandaı bolsa – mektep te sondaı bolmaqshy. Iaǵnı muǵalim bilimdi bolsa, ol mektepten balalar kóbirek bilim alyp shyqpaqshy» -degen eken. Dál osy ataýǵa laıyqty mektepterdiń biri – Shymkent qalasyndaǵy №65 mektep-gımnazııa.
Talaı taý tulǵalardyń qanattaryn qaqtyrǵan bilim oshaǵynda ustaz atty ulaǵatty kásiptiń ıesi Mıra Tashımbetova jumys jasaıdy. 45 jyldan beri bastaýysh synyp oqýshylaryna bilim nárin sebýde.
Mıra Meıirbekqyzy tek bilikti maman ǵana emes, tájirıbeli jetekshi ustaz. Ol respýblıkalyq, oblystyq, qalalyq deńgeıdegi semınar – keńesterde óz tájirıbesimen bólisip, úlken jetistikterge jetken.
«Qazaq eliniń úzdik ustazy» kitabyna engen. Árbir sabaǵy ónegege toly ustaz balanyń jan dúnıesin baıytýǵa, rýhanı nár berýge, dúnıetanymdyq kózqarasyn keńeıtýge asa kóp mán beredi. Ustazdyń ár sabaǵynda osy maqsattar bir- birimen astasyp, óz órnegin taýyp jatady.
Búginde mártebeli ustazdyń bilim bergen oqýshylary respýblıkada júırikter qatarynan tanylyp júr.
«Eńbegimniń jemisi – oqýshylarymnyń jetistiginen kórinedi. Eshqashan sharshadym degen emespin. Sebebi ustazdyq qyzmet adamdyq boryshpen ushtasyp jatyr. Urpaqqa bilim men tárbıe berý arqyly qoǵamdy qalyptastyryp jatqanymdy jete túsinemin», - deıdi Mıra muǵalim.
Uzaq jyldar boıy atqarǵan pedagogıkalyq eren eńbegi úshin 2011 jyly QR Bilim jáne ǵylym mınıstrliginiń «Qurmet » gramotasymen, 2017 jyly Elbasynyń Jarlyǵy boıynsha «Shapaǵat» medalimen nagradtalǵan.
Shymkent qalasy ákimdiginiń baspasóz qyzmeti
