Birneshe kúnnen beri áleýmettik jeli toptarynda tolassyz pikirtalas júrip jatyr. Bul jolǵy taqyryp zeınet jasyndaǵy muǵalimderdiń jastarǵa ornyn bosatýǵa baılanysty. Esterińizge salyp óteıik, bul pikirdi Facebook áleýmettik paraqshasynda Aıman Saǵıdýlla jazǵan bolatyn.
Bylaıǵy jurt Aıman Saǵıdýllany jaı ǵana muǵalim dep qana emes, muǵalimderdiń quqyǵyn qorǵaýshy, ádiletsizdikpen qasqaıyp kúresýshi retinde jaqsy tanıdy. Aıman ustazdyń talaı máselege tabandylyq tanytyp, ıgi maqsatqa qol jetkizgenin eshkim joqqa shyǵara qoımas. Sondaı sheshimi tabylǵan mańyzdy, iri máseleniń biri – muǵalimderdi májbúrlep gazet-jýrnalǵa jazdyrmaý, senbilik sııaqty kóshe tazalaý jumystaryna shyǵarmaý, qaǵazbastylyqtan arylý t.b. Qolyna julymy shyqqan sypyrǵy ustap, shań-tozańnyń ishinde qoqys jınap júrgen muǵalimder ózara kúńkilden ári aspaı júrgende, 2015 jyly eń birinshi bolyp osy Aıman Saǵıdýlla «muǵalimniń mindetine kirmeıtin ispen aınalyspaıtynyn» málimdegen edi.
Sol tusta aqparat quraldary arqyly qaımyqpaı óz ustanymyn jetkizgen Aıman ustaz osyǵan deıingi siresken seńdi sógip edi. Munan keıin de Aıman Saǵıdýlla qanshama ádiletsizdikten japa shekken muǵalimniń quqyǵyn qorǵap, jeńiske jetken. Keıinirek mektepterde gazet-jýrnalǵa májbúrlep jazdyrtý máselesin de memlekettik deńgeıde kótergen Aıman Saǵıdýlla, Meıirjan Temirbek atty ustazdarymyz zańsyz árekettiń jaıylýyna toqtaý saldy.
Bulardyń bárin nege tizip aıtyp otyrmyz? Túneýkúngi áleýmettik jelidegi birqatar muǵalimderdiń Aımannyń zeınetkerler týraly aıtqan pikirine shala-búlinýi men toqymyn baýyryna alyp týlaýy túrtki boldy. Osy tartysqa toly pikirlerge qarap-aq qoǵamnyń kelbetin kóresiz. Aldymen jazylǵan pikirdiń mán-maǵynasyn túsinýge, A.Saǵıdýllanyń aıtpaǵy ne ekenin jete túsinip almaı jatyp, qarsy pikirdi qarsha boratý bizdiń muǵalimderdiń óresiniń kórsetkishi me, álde...
Munan bólek, osy pikirtalas barysynda nazarymyzdy erekshe buryp, basymyzdy eriksiz shaıqatqan dúnıe – Aıman Saǵıdýllanyń fotosyna taǵylǵan min boldy. Aımannyń pikirin maqala retinde shyǵarǵan saıt onyń jeke muraǵatyndaǵy fotosyn jarııalaǵan. Mine, osy fotodaǵy Aımannyń qolyn kóterip, áldeneni túsindirip turǵan beınesine qatysty: «Qolyn shoshaıtyp alyp...» dep kijingen pikirler kóńilimizge kirbiń túsirdi. Biz nege osyndaımyz? Keshe ǵana tóbemizge kóterip, maqtaǵan azamatymyz sál súrinse, aıaýsyz tepkiniń astyna alýdan taıynbaımyz.
Bul jerde Aıman Saǵıdýllany arashalap alý maqsatymyz emes. Sebebi, onyń aıtqan pikiri 100 paıyz durys! Bul jerdegi aıtpaǵymyz eki sózden bes qatesi órilgen keıbir ustazdardyń attanǵa shúreń qosyp, qıqýlaı jóneletini. Al aıtylǵan pikirdiń astaryna úńile almaıtyn, shyndyqqa tike qaraı almaıtyn, jaltaqtyqty jalaý etken muǵalimderdiń áli de elimizde azaımaǵanyn kórsetedi. Mine, eń úlken ókinish te osydan týyndap otyr.
Muqash MURATULY,
«Adyrna» ulttyq portaly.
