بىرنەشە كۇننەن بەرى الەۋمەتتىك جەلى توپتارىندا تولاسسىز پىكىرتالاس ءجۇرىپ جاتىر. بۇل جولعى تاقىرىپ زەينەت جاسىنداعى مۇعالىمدەردىڭ جاستارعا ورنىن بوساتۋعا بايلانىستى. ەستەرىڭىزگە سالىپ وتەيىك، بۇل پىكىردى Facebook الەۋمەتتىك پاراقشاسىندا ايمان ساعيدۋللا جازعان بولاتىن.
بىلايعى جۇرت ايمان ساعيدۋللانى جاي عانا مۇعالىم دەپ قانا ەمەس، مۇعالىمدەردىڭ قۇقىعىن قورعاۋشى، ادىلەتسىزدىكپەن قاسقايىپ كۇرەسۋشى رەتىندە جاقسى تانيدى. ايمان ۇستازدىڭ تالاي ماسەلەگە تاباندىلىق تانىتىپ، يگى ماقساتقا قول جەتكىزگەنىن ەشكىم جوققا شىعارا قويماس. سونداي شەشىمى تابىلعان ماڭىزدى، ءىرى ماسەلەنىڭ ءبىرى – مۇعالىمدەردى ماجبۇرلەپ گازەت-جۋرنالعا جازدىرماۋ، سەنبىلىك سياقتى كوشە تازالاۋ جۇمىستارىنا شىعارماۋ، قاعازباستىلىقتان ارىلۋ ت.ب. قولىنا جۇلىمى شىققان سىپىرعى ۇستاپ، شاڭ-توزاڭنىڭ ىشىندە قوقىس جيناپ جۇرگەن مۇعالىمدەر ءوزارا كۇڭكىلدەن ءارى اسپاي جۇرگەندە، 2015 جىلى ەڭ ءبىرىنشى بولىپ وسى ايمان ساعيدۋللا «مۇعالىمنىڭ مىندەتىنە كىرمەيتىن ىسپەن اينالىسپايتىنىن» مالىمدەگەن ەدى.
سول تۇستا اقپارات قۇرالدارى ارقىلى قايمىقپاي ءوز ۇستانىمىن جەتكىزگەن ايمان ۇستاز وسىعان دەيىنگى سىرەسكەن سەڭدى سوگىپ ەدى. مۇنان كەيىن دە ايمان ساعيدۋللا قانشاما ادىلەتسىزدىكتەن جاپا شەككەن مۇعالىمنىڭ قۇقىعىن قورعاپ، جەڭىسكە جەتكەن. كەيىنىرەك مەكتەپتەردە گازەت-جۋرنالعا ماجبۇرلەپ جازدىرتۋ ماسەلەسىن دە مەملەكەتتىك دەڭگەيدە كوتەرگەن ايمان ساعيدۋللا، مەيىرجان تەمىربەك اتتى ۇستازدارىمىز زاڭسىز ارەكەتتىڭ جايىلۋىنا توقتاۋ سالدى.
بۇلاردىڭ ءبارىن نەگە ءتىزىپ ايتىپ وتىرمىز؟ تۇنەۋكۇنگى الەۋمەتتىك جەلىدەگى بىرقاتار مۇعالىمدەردىڭ ايماننىڭ زەينەتكەرلەر تۋرالى ايتقان پىكىرىنە شالا-ءبۇلىنۋى مەن توقىمىن باۋىرىنا الىپ تۋلاۋى تۇرتكى بولدى. وسى تارتىسقا تولى پىكىرلەرگە قاراپ-اق قوعامنىڭ كەلبەتىن كورەسىز. الدىمەن جازىلعان پىكىردىڭ ءمان-ماعىناسىن تۇسىنۋگە، ا.ساعيدۋللانىڭ ايتپاعى نە ەكەنىن جەتە ءتۇسىنىپ الماي جاتىپ، قارسى پىكىردى قارشا بوراتۋ ءبىزدىڭ مۇعالىمدەردىڭ ورەسىنىڭ كورسەتكىشى مە، الدە...
مۇنان بولەك، وسى پىكىرتالاس بارىسىندا نازارىمىزدى ەرەكشە بۇرىپ، باسىمىزدى ەرىكسىز شايقاتقان دۇنيە – ايمان ساعيدۋللانىڭ فوتوسىنا تاعىلعان ءمىن بولدى. ايماننىڭ پىكىرىن ماقالا رەتىندە شىعارعان سايت ونىڭ جەكە مۇراعاتىنداعى فوتوسىن جاريالاعان. مىنە، وسى فوتوداعى ايماننىڭ قولىن كوتەرىپ، الدەنەنى ءتۇسىندىرىپ تۇرعان بەينەسىنە قاتىستى: «قولىن شوشايتىپ الىپ...» دەپ كىجىنگەن پىكىرلەر كوڭىلىمىزگە كىربىڭ ءتۇسىردى. ءبىز نەگە وسىندايمىز؟ كەشە عانا توبەمىزگە كوتەرىپ، ماقتاعان ازاماتىمىز ءسال سۇرىنسە، اياۋسىز تەپكىنىڭ استىنا الۋدان تايىنبايمىز.
بۇل جەردە ايمان ساعيدۋللانى اراشالاپ الۋ ماقساتىمىز ەمەس. سەبەبى، ونىڭ ايتقان پىكىرى 100 پايىز دۇرىس! بۇل جەردەگى ايتپاعىمىز ەكى سوزدەن بەس قاتەسى ورىلگەن كەيبىر ۇستازداردىڭ اتتانعا شۇرەڭ قوسىپ، قيقۋلاي جونەلەتىنى. ال ايتىلعان پىكىردىڭ استارىنا ۇڭىلە المايتىن، شىندىققا تىكە قاراي المايتىن، جالتاقتىقتى جالاۋ ەتكەن مۇعالىمدەردىڭ ءالى دە ەلىمىزدە ازايماعانىن كورسەتەدى. مىنە، ەڭ ۇلكەن وكىنىش تە وسىدان تۋىنداپ وتىر.
مۇقاش مۇراتۇلى،
«ادىرنا» ۇلتتىق پورتالى.
