Búgin Qazaqstan halqy Assambleıasynyń XXVIII sessııasynda toǵyz depýtattyń Májiliske baratyny belgili boldy. Daýys berýge Assambleıanyń 351 múshesi qatysyp, toǵyz adamǵa daýys berdi. Olar kimder?
Sonymen Saýytbek Abdrahmanov - 298, Avetık Amırhanıan - 270, Ilıas Býlarov - 274, Natalıa Dementeva - 292, Iýrıı Lı - 282, Vakıl Nabıev - 285, Shamıl Osın - 271, Vladımır Tohtasýnov - 277, Abılfas Hamedov 290 daýys aldy.
Bir ereksheligi, keshe Qazaqstandaǵy Májilis saılaýyna saılaýshylardyń 63 paıyzdan astamy qatyssa, búgingi Assambleıadan usynylǵan 9 ókilgebar-joǵy 351 adam daýys berdi. Bul Elbasy negizin qalap bergen Assambleıanyń halyqtyq daýystan aıyrmashylyǵy. Assambleıanyń artyqshylyǵy sonda, olardan parlamentke usynylǵan úmitkerdi Qazaqstan halqy emes, ózderi saılaıdy. Biraq táýelsizdik alǵanymyzǵa -30 jyl, Assambleıanyń qurylǵanyna 25 jyldan astam ýaqyt ótse de, etnos ókilderiniń 100 paıyz qazaqsha sóılep ketken biri joq. Árıne memlekettik tilde sóıleıtin biren-sarandary bar. Assambleıa jıyny bolsa, ylǵı solardy alǵa shyǵarady. Elbasynyń, Prezıdent Toqaevtyń aldynda sóıletedi. Olar da kósile sóıleýge úırenip aldy qazir. Sózden jańylyspaıdy, oqýshynyń taqpaq jattaǵanyndaı kósiledi. Jattap aldy ma, joq pa, bizge de qazir báribir bolyp qaldy. Biraq búgin saılanǵan «toǵyz tulǵa» qazaqtyń kúıin kúıttep, memleket tildiń múddesi úshin arpalysyp, sottasyp júrgen bir Oǵyz Doǵannyń tirligin isteı ala ma? Jattandy sóz tatýlyq pen tutastyqqa, yntymaq, birlikke ǵana qurylatyn Assambleıadaǵy «toǵyzdyń jyry» Oǵyzdyń jyryna aınala ala ma? Másele sonda. Assambleıanyń qaı jıyny bastan-aıaq qazaq tilinde ótip edi?! Saýsaqpen sanarlyqtaı ǵana.
Aıta bersek, Assambleıa jaıly áńgime kóp. Áleýmettik jeli de azannan beri saılanǵan toǵyz depýtatqa qatysty jyryn keńinen tolǵap jatyr.
–Bul 9 depýtat Májiliste qazaqtyń múddesin qorǵaı ma, álde ózderine daýys bergen etnostardyń múddesin qorǵaı ma? Eń bastysy, monoultty Qazaqstannyń negizi - biz, qazaqtar, osy 9 depýtatqa daýys bermesek, nege olar Májiliste 4 jyl bizdiń esebimizden mıllıondap jalaqy alyp, depýtattyq mandattyń qyzyǵyn kórý kerek?!. Assambleıa atynan túsip jatqan 9 úmitkerdiń qatarynda uzaq jyl « Egemen Qazaqstan» gazetin basqarǵan Saýytbek Ábdirahmanov júr. Sonda ol qazaq emes pe? Ol qaı etnostyń ókili? Eshbir memlekette joq, tek Qazaqstanda ǵana ústemdik etip turǵan bul qandaı zań?, – deıdi Azamat Tasqarauly óziniń áleýmettik jelidegi jazbasynda.
Jaqynda memleket basshysy Qasym-Jomart Toqaev qazaq tilin áli jete meńgermegen otandastarǵa úndeý tastady.
–Memlekettik tildi bilý – Qazaqstannyń árbir azamatynyń paryzy. Mindeti dep te aıtýǵa bolady. Jastar aǵylshyn tilin nemese basqa da tilderdi az ǵana ýaqytta meńgere alatynyn kórip otyrmyz. Tutas býyn almasqan osy jyldarda qazaq tilinúırengisi kelgen adam ony áldeqashan bilip shyǵaredi. Halqymyzda «Eshten kesh jaqsy» degen sózbar. Eń bastysy, ynta bolýy kerek, – dedi Prezıdent Toqaev.
...Endeshe osy memlekettiń asyn iship, aýasyn jutqan Assambleıadan saılanyp Májilis minberinde sóz sóıleıtin «toǵyzdyń jyry» árqashan Oǵyzdyń jyryna aınalýy kerek.
«Adyrna» ulttyq portaly
