«Aq jol» demokratiialyq partiiasynyŋ XVI sailaualdy qūryltaiynda arnaiy baiandama jasaǧan partiianyŋ töraǧasy Azat Peruaşev «Aşarşylyqty halyqaralyq deŋgeide zūlmat dep tanuǧa» şaqyrdy dep habarlaidy, «Adyrna» ūlttyq portaly partiianyŋ baspasöz qyzmetıne sılteme jasap.
«Biyl mamyr aiynda «Aq jol» demokratiialyq partiiasy Prezident Q.Toqaevtyŋ stalindık quǧyn-sürgın qūrbandaryn aqtau şaralaryn jalǧastyru turaly tapsyrmasyna qoldau bıldırdı. Bız keŋestık totalitarlyq bilıktıŋ qazaq halqyna ädeiı jasalǧan aşarşylyqty halyqaralyq deŋgeide zūlmat dep tanuǧa şaqyrdyq. Bolşevikter äskerlerınıŋ kollektivizasiia kezındegı jüzdegen qazaq köterılısterın janşyp basuyn, öz auyldaryn qūtqaramyn dep, basyn ölımge tıkken batyrlardyŋ erlık ısterın qaita qarau kerek dep sanaimyz», -dedı partiia jetekşısı Peruaşev öz baiandamasynda.
Qazaqtyŋ ötken tarihynda saiasi baǧasy älı künge deiın berılmei kele jatqan oqiǧalar az emes. Solardyŋ bırı «Aq jol» partiiasy söz etıp otyrǧan aşarşylyq oqiǧasy. Öz tarihyndaǧy qara taŋbaly oqiǧalaryna köp el saiasi baǧasyn äldeqaşan berıp qoiǧan. Ökınışke qarai, bızdegı sonau bır zūlmat jyldar bügınge deiın tarihi, saiasi atauyn ala almai keledı. Sonymen qatar jyl saiyn 31 mamyrda «Saiasi qūrbandardy eske alu» künınde qazaq qoǧamy eskertkışke gül şoqtaryn qoiumen ǧana şekteletını janǧa batady.
Aşarşylyq qazaq dalasynda qolmen jasalǧan genosid ekenıne mūraǧattaǧy qūjattar dälel ekenıne qaramastan, künı bügınge deiın milliondaǧan qazaqty aştan qyrǧan sol zūlmattyŋ saiasi baǧasy berılmeuı qazırgı ūrpaqqa syn emes pe? Sız ne deisız?
«Eŋ äuelı aşarşylyq taqyryby bızdegı betı tūtas aşylmaǧan taqyryptyŋ bır dep sanaimyn. Aşarşylyqqa qatysty qanşama şyǧarma düniege kelgenımen, teŋızge tamǧan tamşydai ǧana boluda. Nege? Öitkenı derektı qūjattardyŋ köp bölıgı reseilık mūraǧattarda. Bızde osy aşarşylyq turaly qūndy şyǧarma dep tek Valerii Mihailovtyŋ «Hronika velikogo djuta» şyǧarmasyn aituǧa bolady. Däl osyndai salmaqty dünieler köptep jaryqqa şyqsa, halyq arasynda keŋınen tanylsa, mıne, sol kezde ǧana jūrt «būl qalai?» dep sūrau salar edı. Al qazır ekınıŋ bırı qazaq dalasynda aştyq jailaǧanyn bıledı, bıraq onyŋ qalai paida bolǧanyn, qalai jürgenın jete bıle bermeidı. Sonyŋ saldarynan da ūrpaǧymyz būl zūlmat jyldardyŋ tarihtaǧy taŋbasyna asa män bere bermeidı. «Genosid» dep baǧasyn berudı sūraityn ūrpaq kerek bızge»,- deidı jas tarihşy, zertteuşı Meiırjan Smaǧūl.
Qalai desek te, ötken aǧa buyn ūrpaqtyŋ azapty jyldary aşarşylyq Qazaq tarihynda özınıŋ saiasi baǧasyn alatyn jäne sony talap etetın sät tuǧany anyq. Būl rette «Aq Jol» partiiasynyŋ mynadai bastamasyn tek qana qoldau kerek siiaqty, sız ne deisız, qūrmettı oqyrman?
Meruert HUSAİNOVA,
«Adyrna» ūlttyq portaly.
Foto aşyq derekközden alyndy.Ūqsas jaŋalyqtar
