Qazaqstan Jazýshylar odaǵynda bir top qalamgerge Halyqaralyq «Alash» syılyǵy tapsyryldy.
Áleýeti zor bul syılyq eń alǵash ret egemendiktiń eleń-alańynda Túrkııadan qonys aýdarǵan abyz aqsaqal Halıfa Altaıǵa berilgen eken. Syılyq sodan beri úzdiksiz ıelerin taýyp keledi.
– Halyqaralyq mańyzdy syılyqtyń búgingi ıegerleri básekege túsken 74 adamnyń ishinen iriktelinip alyndy, – dedi Qazaqstan Jazýshylar odaǵy Basqarma tóraǵasynyń birinshi orynbasary, aqyn Ǵalym Jaılybaı. – Qazaqstan Respýblıkasy Táýelsizdiginiń 25 jyldyq merekesi qarsańynda, elimiz úshin eń ulyq merekeniń aldynda osyndaı marapatqa ıe bolýlaryńyzben shyn júrekten quttyqtaımyn. Otbasylaryńyzǵa amandyq, shyǵarmashylyq qyzmetterińizge budan da zor tabys tileımin!
Syılyq ıelerine arnaıy dıplommen qosa laýreattyq tósbelgi, aqshalaı syılyq berildi.
Oza shaýyp báıge alǵan darabozdardyń aldyńǵy shebinde el gazeti «Egemen Qazaqstannyń» eki birdeı qalamgeri bar. Biri – gazettiń ardageri, jazýshy-jýrnalıst, dramatýrg Jumagúl Qýanyshbekqyzy (Soltıeva). Ol «Saǵym qýǵandar», «Áıel mahabbaty» pesalary úshin, al aqyn-pýblııst Qorǵanbek Amanjol «Alapa» óleńder jınaǵy úshin ıelendi.
…Alǵashqy sol bir óleńmen
Órilip shyqqan ónermen,
Qus joly qalqyp tóbemnen,
Qıqýmen janym jebelgen,
Áli de ushyp kelem men!..
– dep saltanattyń shyraıyn jyrmen ashqan adýyndy aqyn Qorǵanbek Amanjoldyń syrly óleńinen soń aqsaqal qalamgerler – Ádibaı Tabyldıev pen Ábilfaıyz Ydyrysov marapat ıelerine alǵys, tilekterin bildirdi.
Sonymen qatar, Moldahmet Qanazov, Sultan Orazalınov, Ótegen Oralbaev, Janat Áskerbekqyzy, Qýanyshbaı Qurmanǵalıuly qatarly birqatar belgili qalamgerler ádebı syılyqtyń ıegerleri atandy.
Talǵat SÚIINBAI,
«Egemen Qazaqstan».