قازاقستان جازۋشىلار وداعىندا ءبىر توپ قالامگەرگە حالىقارالىق «الاش» سىيلىعى تاپسىرىلدى.
الەۋەتى زور بۇل سىيلىق ەڭ العاش رەت ەگەمەندىكتىڭ ەلەڭ-الاڭىندا تۇركيادان قونىس اۋدارعان ابىز اقساقال حاليفا التايعا بەرىلگەن ەكەن. سىيلىق سودان بەرى ۇزدىكسىز يەلەرىن تاۋىپ كەلەدى.
– حالىقارالىق ماڭىزدى سىيلىقتىڭ بۇگىنگى يەگەرلەرى باسەكەگە تۇسكەن 74 ادامنىڭ ءىشىنەن ىرىكتەلىنىپ الىندى، – دەدى قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى، اقىن عالىم جايلىباي. – قازاقستان رەسپۋبليكاسى تاۋەلسىزدىگىنىڭ 25 جىلدىق مەرەكەسى قارساڭىندا، ەلىمىز ءۇشىن ەڭ ۇلىق مەرەكەنىڭ الدىندا وسىنداي ماراپاتقا يە بولۋلارىڭىزبەن شىن جۇرەكتەن قۇتتىقتايمىن. وتباسىلارىڭىزعا اماندىق، شىعارماشىلىق قىزمەتتەرىڭىزگە بۇدان دا زور تابىس تىلەيمىن!
سىيلىق يەلەرىنە ارنايى ديپلوممەن قوسا لاۋرەاتتىق ءتوسبەلگى، اقشالاي سىيلىق بەرىلدى.
وزا شاۋىپ بايگە العان دارابوزداردىڭ الدىڭعى شەبىندە ەل گازەتى «ەگەمەن قازاقستاننىڭ» ەكى بىردەي قالامگەرى بار. ءبىرى – گازەتتىڭ ارداگەرى، جازۋشى-جۋرناليست، دراماتۋرگ جۇماگۇل قۋانىشبەكقىزى (سولتيەۆا). ول «ساعىم قۋعاندار»، «ايەل ماحابباتى» پەسالارى ءۇشىن، ال اقىن-پۋبليتسيست قورعانبەك امانجول «الاپا» ولەڭدەر جيناعى ءۇشىن يەلەندى.
…العاشقى سول ءبىر ولەڭمەن
ءورىلىپ شىققان ونەرمەن،
قۇس جولى قالقىپ توبەمنەن،
قيقۋمەن جانىم جەبەلگەن،
ءالى دە ۇشىپ كەلەم مەن!..
– دەپ سالتاناتتىڭ شىرايىن جىرمەن اشقان ادۋىندى اقىن قورعانبەك امانجولدىڭ سىرلى ولەڭىنەن سوڭ اقساقال قالامگەرلەر – ءادىباي تابىلديەۆ پەن ءابىلفايىز ىدىرىسوۆ ماراپات يەلەرىنە العىس، تىلەكتەرىن ءبىلدىردى.
سونىمەن قاتار، مولداحمەت قانازوۆ، سۇلتان ورازالينوۆ، وتەگەن ورالباەۆ، جانات اسكەربەكقىزى، قۋانىشباي قۇرمانعاليۇلى قاتارلى بىرقاتار بەلگىلى قالامگەرلەر ادەبي سىيلىقتىڭ يەگەرلەرى اتاندى.
تالعات ءسۇيىنباي،
«ەگەمەن قازاقستان».