22 qarasha Almaty qalasyndaǵy «Atakent» KO «Uly Jibek jolymen–2023» XI Halyqaralyq kitap jáne polıgrafııa kórmesiniń forýmy alańynda qazaqtyń belgili aqyny Ǵalym Jaılybaıdyń «Jalǵyz qaraǵaı» atty jyr jınaǵynyń tusaýkeseri ótti, dep habarlaıdy «Adyrna» ulttyq portaly.
Abaı atyndaǵy memlekettik syılyqtyń jáne Túrki áleminiń «Túrik birligi» ádebı syılyǵynyń laýreaty, Qazaqstannyń eńbek sińirgen qaıratkeri, Halyqaralyq «Alash» ádebı syılyǵy men «Qurmet» ordeniniń ıegeri, qazaqtyń belgili aqyny Ǵalym Jaılybaıdyń «Jalǵyz qaraǵaı» atty jyr jınaǵy «Atamura» baspasynda jaryq kórdi.
Qazaq poezııasynda ózindik orny bar aqynnyń bul kitabyna keıingi jyldarda jazylǵan óleńderi men poemalary toptastyrylǵan. Aqynnyń aıtýynsha, kitapta azamattyq, el, jer týraly, pandemııa kezi men «Qańtar oqıǵasy» týraly óleńderi de bar.
«Búgingi kórmede «Jalǵyz qaraǵaı» degen kitabymnyń tusaýy kesildi. Bul ýaqytqa deıin kóptegen kitap jazdym. Al bul kitabymnyń ereksheligi «Atamura» sekildi elimizdiń óristi, órkenıetti, qasıetti baspasynan shyǵýy. «Atamura» kitaphanasy serııasy boıynsha jigitter asa jaýapkershilikpen daıyndady, rıza boldym. Odan keıin kitaptyń «Jalǵyz qaraǵaı» atalýy da beker emes. Qazaqtyń belgili ánshisi Áset Naımanbaevtyń máıiti arǵy bette jatyr. Sol máıitke Naımanbaı qystaǵyndaǵy ákesiniń topyraǵyn aparyp qostym. Sol jerdiń aty Jalǵyz qaraǵaı atalady eken. Sondyqtan osy kitaptyń atyn «Jalǵyz qaraǵaı» qoıǵym keldi. Ishinde shaǵyn poemam, azamattyq, el men jer týraly, pandemııa men «Qańtar oqıǵasy» kezinde jazylǵan kóp óleńder bar», -dedi aqyn Ǵalym Jaılybaı.
Aqynnyń óleńderinde ómir, taǵdyr, tabıǵat tylsymdary ózara astasyp jatady. Jyrlaryndaǵy lırıkalyq ishki ıirimderimen qosa fılosofııalyq oı túıýi oqyrman kóńilinen shyǵyp keledi.
Sııasy keppegen jańa basylymnyń tusaýkeserine qazaqtyń belgili aqyn-jazýshylary kelip, izgi tilekterin bildirip ketti. Abaı atyndaǵy respýblıkalyq mamandandarylǵan daryndy balalarǵa arnalǵan orta-mektep ınternatynyń oqýshylary aqynnyń týyndylaryn oqydy. Al týyndyny basyp shyqqan «Atamura» baspasy aqynǵa at mingizdi.
«Belgili aqyn, memlekettik syılyqtyń ıegeri Ǵalym Jaılybaı aǵamyzdyń «Jalǵyz qaraǵaı» kitabynyń tusaýy kesilýde. Kitapta 126 óleń, 3 poema enip otyr. Kitapty kózi qaraqty, kókiregi oıaý jastar men oqyrman oqıdy dep oılaımyn. Óıtkeni, týyndy oı salmaı qoımaıdy.
Biziń baspa 3 baǵytta kitap shyǵarady. Birinshisi – «Atamura» kitaphanasy serııasy. Onda 200-ge jýyq qazaqtyń eń tańdaýly aqyn-jazýshysynyń kitaby iriktelgen. Olar Abaı, Muhtar Áýezovterden bastalyp, kózi tiri klassıktermen jalǵasyn tabady», - dedi «Atamura» korporaııasynyń prezıdenti Raqymǵalı Qul-Muhammed.
Aıta keteıik, «Atamura» baspasy qazaqtyń belgili qalamgerlerimen birge el aýzynda júrgen, alaıda shyǵarmalary sırek jaryq kórgen naǵyz talanttardyń týyndylaryn, sondaı-aq jyry jaýhar, sózi tumadaı tunyq jastardy da tap basyp tanyp, olardyń eńbekterin talǵampaz oqyrman qaýymǵa usynyp júr.
Baspa biraz jyldan beri kópshilik oqyrmanǵa arnalǵan «Atamura» kitaphanasy» jáne mektep jasyndaǵy balalarǵa arnalǵan «Atamura» mektep kitaphanasy», sonymen qatar búldirshinderge arnalǵan «Meniń alǵashqy kitapsham» atty serııalaryn shyǵaryp keledi. «Atamura» kitaphanasy» jáne «Atamura» mektep kitaphanasy» serııalary boıynsha qazaqtyń tanymal aqyn-jazýshylardyń shyǵarmalaryn basyp shyǵarý dástúrge aınalǵan.
