2014 jyly Óńirlerdi damytýdyń 2020 jylǵa deıingi biryńǵaı baǵdarlamasy qabyldandy. Bul baǵdarlamaǵa «Aımaqtardy damytý», «Mono-qalalardy damytý», «Aqbulaq», «Turǵyn úı-kommýnaldyq sharýashylyqty jańǵyrtý», «Qoljetimdi baspana–2020», sondaı-aq shaǵyn qalalardy damytý baǵdarlamasynyń jobasy engizilgen edi.
Jalpy, mundaı baǵdarlamalar az emes jáne halyq úshin barynsha paıdasyn beretini anyq. Máselen, joǵaryda sóz etilgen baǵdarlama elimizdiń utymdy aýmaqtyq uıymyn qalyptastyrý jolymen óńirlerdiń áleýmettik-ekonomıkalyq áleýetin damytý úshin jaǵdaı jasaý, halyq kapıtalyn ekonomıkalyq ósimi joǵary ortalyqtarǵa shoǵyrlandyrýdy kózdeıdi. Baǵdarlama aıasynda halyqtyń qaı aımaqta turatynyna qaramastan, ınfraqurylymdy damytý arqyly turǵyndardyń ómir súrý sapasyn arttyrýǵa basa mán berildi. Osy baǵdarlamanyń eń ózekti bir tarmaǵy halyqty aýyz sýmen jáne sý burý qyzmetterimen tıimdi jáne utymdy qamtamasyz etý.
«Bizdiń qaǵıdamyz barshańyzǵa málim: qýatty aımaqtar – qýatty Qazaqstan. Azamattarymyzdy tolǵandyrǵan naqty máseleler jergilikti deńgeıde sheshilýi tıis. Jergilikti ózin-ózi basqarý júıesin nyǵaıtamyz. Aımaqtaǵy qordalanǵan máselelerdi sheshýge halyq belsene aralasatyn bolady», – dedi Q.Toqaev jetinshi baǵyt týraly. Mine, osy sebepten de on tórt oblysty damytý úshin Óńirlerdi damytýdyń 2020 jylǵa deıingi baǵdarlamasy jasaldy.
Oblystar bir-birimen klımaty, ekonomıkasy, áleýmettik jaǵdaıy, ınfraqurylymy, salalyq damýy jaǵynan erekshelenedi. Sol sebepti, Óńirlerdi damytý baǵdarlamasy negizinde ár oblys óziniń aýmaqtyq damý baǵdarlamalaryn (2016-2020 jyldarǵa arnalǵan) jasaǵan. Aýmaqtyq baǵdarlamalarda kózdelgen ındıkatorlardyń oryndalýy túptep kelgende, Óńirlerdi damytýdyń 2020 jylǵa deıingi baǵdarlamasynyń oryndalýyna yqpal etedi. Bir ǵana aýyldy sýmen jabdyqtaý júıelerin damytýǵa barlyq qarjy kózderinen 100 mlrd teńge bólindi. Qalalar men aýyldarda sýmen jabdyqtaý jáne sý burý júıelerin salý/rekonstrýkııalaý boıynsha 331 joba, toptyq sý qubyrlaryn salý/rekonstrýkııalaý boıynsha 15 joba iske asyryldy. Qalalar men aýyldarda sýmen jabdyqtaý jáne sý burý júıeleri boıynsha 133 nysan paıdalanýǵa berildi. 380 aýyl úshin táýligine 166,44 myń tekshe metr somadaǵy jerasty sý qory bekitildi.
Memlekettik baǵdarlamany iske asyrýǵa 2018 jyly 244,4 mlrd teńge bólingen, onyń ishinde: respýblıkalyq bıýdjet esebinen 130,0 mlrd teńge, jergilikti bıýdjetter esebinen 81,7 mlrd teńge, bıýdjetten tys qarajattar esebinen (kásiporyndar qarajaty) 32,7 mlrd teńge bólindi. Baǵdarlama bıýdjetiniń ıgerilýi 243,5 mlrd teńgeni nemese 99,6 paıyzdy qurady. Desek te, baǵdarlama bıýdjetiniń tolyq ıgerilmeýi de joq emes. Qalalyq jáne aýyldyq eldimekenderde sýmen jabdyqtaý jáne sý burý jónindegi jobalardy iske asyrý sheńberinde respýblıkalyq bıýdjetten bólingen qarajattyń eń kóp ıgerilmeýi Qyzylorda (37,6 mln teńge), Shyǵys Qazaqstan (18,2 mln teńge), Túrkistan (6,9 mln teńge) jáne Jambyl (5,3 mln teńge) oblystaryna tıesili.
«Aýyl – el besigi» jobasy aıasynda 3 477 aýyl jańartylyp, aýyl halqynyń 90 paıyzy nemese 7 mln adam sapaly aýyzsýmen qamtamasyz etiledi. Baǵdarlamany júzege asyrý úshin 1,3 trln teńge bólý josparlanǵan. Búginge deıin osy baǵdarlamanyń baǵyty boıynsha tutas tarmaqtary júzege asyrylyp, aýyl halqynyń basym bóligi aýyz sýmen qamtamasyz etildi.
«Adyrna» ulttyq portaly
