MMA áleminiń juldyzy Habıb Nurmaǵamedovti bortserikpen sózge kelip qalǵany úshin ushaqtan túsirip jiberdi, dep habarlaıdy "Adyrna" ulttyq portaly.
Oqıǵa American Airlines ushaǵynda bolǵan. Habıb pen onyń seriktesteri ushaqta tótenshe jaǵdaı kezinde kómek kórsetetin jolaýshylar qataryna otyrǵyzylǵan.
Ushaq ushar aldynda bortserik Habıbten ornyn aýystyrýdy suraǵan. Alaıda, Nurmaǵamedov oryn aýystyrýdan bas tartqan soń, stıýardessa qyzmetkerdi shaqyryp, ol Habıbti reısten túsirýge májbúr bolǵan.
Áleýmettik jelide jarııalanǵan kadrlarda stıýardessa Nýrmagomedovke avarııalyq shyǵý joly janynda otyrýǵa ruqsat bere almaıtynyn aıtyp, reısten túsirýmen qorqytqan.
"Bul ádiletsizdik. Men ornymdy aýystyryp, ári-beri júrmeımin", – dep jaýap bergen sportshy.
