Memleket basshysy Qasym-Jomart Toqaev respýblıka halqyna kezekti Joldaýyn 1 qyrkúıek kúni jarııalaıdy dep habarlaıdy "Adyrna" tilshisi KAZ.NUR.KZ-ke silteme jasap.
Bul týraly el prezıdentiniń baspasóz hatshysy Berik Ýálı Facebook áleýmettik jelisindegi paraqshasynda jazdy.
"Memleket basshysynyń Qazaqstan halqyna arnaǵan jyl saıynǵy dástúrli Joldaýy 2020 jyldyń 1 qyrkúıek kúni ótetin Parlamenttiń kezekti sessııasynyń ashylýynda jarııalanady dep josparlanyp otyr. Parlamenttiń qos Palatasynyń birlesken otyrysynda Prezıdent Qasym-Jomart Toqaev elimizdiń daǵdarystan keıingi kezeńdegi negizgi damý maqsattary jaıynda aıtady. Joldaýdyń basym bóligi ekonomıkalyq jáne áleýmettik máselelerge arnalady", - dedi ol.
Aıta keteıik, májilis tóraǵasy Nurlan Nyǵmatýlın Qazaqstan Respýblıkasy parlamenti palatalarynyń birlesken otyrysyn shaqyrý týraly ókimge qol qoıǵan bolatyn. Otyrys 1 qyrkúıekte saǵat 11-de ótedi. Al Nursultan Nazarbaevtyń qatysýymen ótýi tıis bolǵan Nur Otan saıası keńes bıýrosynyń otrysy taǵy da keıinge shegerildi. Bul týraly Baýyrjan Baıbek áleýmettik jelisindegi resmı paraqshasynda habardar etti. Onyń sózinshe, otyrys 28 tamyz kúni ótedi dep josparlanýda.
Esterińizge sala keteıik, 2019 jyldyń ekinshi qyrkúıeginde memleket basshysy Qasym-Jomart Toqaev Qazaqstan halqyna alǵashqy joldaýyn jasaǵan bolatyn.
"Adyrna" ulttyq portaly
