Qazaqstandaǧy keibır emhanalar soŋǧy alty aida 12 myŋ jalǧan qabyldau jasap, biudjettıŋ 75 million teŋgesın jelge şaşqan. KTK arnasynyŋ habarlauynşa, körsetılmegen medisinalyq kömektı «körsettık» dep jazǧan.
Jūrt oŋai aqşaǧa kenelgısı kelgenderdıŋ ısın äşkerelep, äleumettık jelıge bırınen soŋ bırı jazba jariialap jatyr. Al mūndai zaŋ būzuşylyqtarǧa medisinalyq saqtandyrudyŋ etı üirengendei. Jūrttyŋ şuynan soŋ, olar ıle-şala alty aida 12 myŋdai qatelık taptyq dep otyr.
Aigül Ötepova elordadaǧy №13 emhanada demıkpe auruymen tırkeude tūr. Tegın därı-därmek alady, därıgerlerı de ony bes sausaǧyndai bıledı. Äleumettık jelılerdegı qyzu talqydan soŋ, Aigül «Damumed» qosymşasyna kırıp, därıger qabyldauyna jazylǧan künderın qaraidy. Söitse, onyŋ da syrtynan qabyldau jasalǧan. Elorda tūrǧyny mūny «alaiaqtyq» dep otyr.
Aigül Ötepova, Nūr-Sūltan qalasynyŋ tūrǧyny: - Uchaskelık därıger özınıŋ şeşımın şyǧaru üşın ol aurudy jeke köruı kerek, jeke kezdesuı kerek. Telefonmen habarlasqan tolyq medisinalyq konsultasiiaǧa jata ma, jatpai ma, bılmeimın. Menıŋ oiymşa, jatpaidy. Eger olar «aurudy qabyldadyq» dep belgılep qoisa, ol – alaiaqtyq. Bızdıŋ aqşany jeu dep sanaimyn.Bas şahardyŋ taǧy bır tūrǧyny Aigül Qanapinanyŋ da «Damumedke» taŋy bar. Ony därıgerlerı tüngı saǧat bır jarymǧa qabyldauǧa jazyp qoiypty.
Aigül Qanapina, Nūr-Sūltan qalasynyŋ tūrǧyny: - 17-mausym künı «Damumed» baǧdarlamasynda menıŋ tüngı saǧat 1 jarymda Nūr-Sūltan qalasynyŋ №2 emhanasyndaǧy därıgerge jazylǧan ekenmın. Ne masqara?! Tünde emhanada menı eşkım qabyldamaityny belgılı ǧoi. Keiın taǧy qarap otyrsam, ekpe egılgen, därı berılgen. Men eşqaisysyn alǧan joqpyn.«Damumed» - Qazaqstanda köşırmesı joq, medisinalyq qyzmettı bır arnaǧa toǧystyrǧan jüie. Mobildı qosymşa arqyly nauqastar därıger qabyldanuyna jazylyp, em alyp, jedel järdemdı de şaqyrta alady. Al astyrtyn jazba jazyp, jalǧan aqpar beru tek qosymşaǧa kıru mümkındıgı barlardyŋ qolynan keletın ıs eken. Jüie avtorlary adamdardy aldaityn emhanalardy anyqtap berdık dep, mäz.
Natalia Kil, «Damu» aqparattyq tehnologiialar ortalyǧy» kompaniiasynyŋ bas direktory: - Bız qadaǧalau organy nemese densaulyq saqtau basqarmasy emespız. Ärdaiym jūmysymyzdy tiianaqty, jaqsy jasauǧa tyrysamyz. Bız adamdarǧa şynaiy aqparatty köruge, zaŋbūzuşylyqty anyqtauǧa mümkındık berdık. Būl – aşyqtyq. Sifrlandyrudyŋ basty maqsaty da osy. Būl qūral siiaqty. Sondyqtan kez kelgen qūral siiaqty, ony dūrys paidalanu kerek.Emhanalardyŋ mūndai äreketke baruynyŋ mänı mynada: «Damumed» arqyly em-dom şaralary jürgızılse, mındettı äleumettık medisinalyq saqtandyru qorynan aqşa bölınedı. «Barmaq basty, köz qystyǧa» barǧan aq halattylar osylai oŋai oljaǧa keneledı. Adamdy emdemei, tek qaltasyna qyzyqqandardyŋ ısın Densaulyq saqtau ministrlıgı bıledı eken. Soŋǧy alty aida anyqtalǧan 12 myŋdai jalǧan qabyldaulardyŋ kesırınen, biudjettıŋ 75 million teŋgesı talan-tarajǧa tüsken.
Baǧdat Qojahmetov, QR densaulyq saqtau ministrlıgınıŋ resmi ökılı: - Qazır zaŋdy tūrǧyda saraptama jürgızılıp jatyr. Därıgerler men emhana basşylaryna qatysty jazany qataŋdatu jaǧyn qarastyramyz. Būl öreskel zaŋbūzuşylyq. Mūndai qatelıkter adamdardyŋ ömırıne, densaulyǧyna qatty äser etuı mümkın.«Tegın emdedık» dep, özderınıŋ nauqastaryn syrtynan emdegen medisinalyq ūiymdar, säikesınşe medisinalyq saqtandyru qoryna da äqatyrdyqä dep esep beretını sözsız. Al qor būqaranyŋ dauynan keiın ılezde zaŋbūzuşylyqtardy anyqtadyq dep aqtaldy. Endı ötırık emdegen emhanalarǧa aiyppūl salynady. Aiyppūl kölemı medisinalyq qyzmet körsetu qūnynyŋ 300 paiyzyn qūraidy. Aq halattylardyŋ qalai emdep, qandai em şaralaryn jürgızgenın qor ökılderı «Damumed» arqyly bılıp almaqşy. 300 paiyzdyq aqşalai ötemdı emhana basşylary öteuı tiıs. Al därıgerler tärtıptık jazamen qūtylady.
"Adyrna" ūlttyq portaly
