Juldyzdardy túsiný

4282
Adyrna.kz Telegram

Bir bala kúnige keshke qyrǵa shyǵyp, juldyzdy aspanǵa tamsana qarap otyrady eken. Kózdiń jaýyn alardaı jarqyraǵan juldyzdarǵa kóz tigip otyryp, ol tezirek úlken bolsam eken dep armandaıdy eken. Onyń keletinin bilip alǵan juldyzdar bolsa balanyń kózine túsý úshin, ózderinshe boıanyp-taranyp álekke túsedi eken. Ata-anasyna kómektesip bolǵan soń qyr basyna shyǵyp kele jatqan balanyń janynan jaqynyraq orynǵa jaıǵasý úshin, juldyzdar aspanda shashyraı júgiredi eken.
Bir kúni bala kóńilsiz, muńaıyp otyrypty. Aspanǵa da burynǵydaı qaramaı júzin tómen sala beripti. Ádette balany kóre salysymen kúmis kirpikterin jypylyqtatyp jarysa bıleı jóneletin juldyzdar ne bolǵanyn túsinbeı únsiz qalypty.
Aspan eshqashan bundaı kóńilsiz jaǵdaıǵa túspegen eken...
Únsizdikti balaǵa jaqyn turǵan bir juldyz buzady.
– Búgin kóńilsizsiń ǵoı. Ne boldy? – dep suraıdy ol.
Sonda bala:
– Aspannan juldyzdar aqqanda men sender jasyrynbaq oınap júr eken dep oılaýshy edim. Biraq, búgin men qozylarymdy baǵyp júrgende bir jolaýshy kezdesti. Ol aspannan juldyz aqqanda, ózimen birge bir adamnyń janyn alyp ketedi, dedi. Bul qalaı bolǵany? Sondaı qatygez be edińder? Sender sondaı ádemisińder, túnde aspandy jadyratyp adasqandarǵa jol silteısińder, dep oılaýshy edim. Endi ne derimdi bilmeı otyrmyn... Men senderden bundaıdy kútken joq edim...
Osy sátte barlyq juldyzdar bir sátke ańtarylyp bir-birine qarady da búkil aspan kúmis kúlkige kómildi. Olardy aı da qostap aspan qońyraýlatqan áýen jańǵyryǵyna bólendi. Sodan soń aı juldyzdarǵa qosylyp, bári qol ustasyp dóńgelene bıleı jóneldi.
Eshteńe túsinbegen bala aı men juldyzdarǵa tań qala qaraı berdi. Qansha ýaqyt ótkeni belgisiz, bir kezde juldyzdar toqtap, balaǵa qarap tura qaldy.
Sál únsizdik oryn aldy. Sodan bir juldyz bylaı dedi:
– Biz juldyzdar eshqashan sónbeımiz. Jáne adamdardyń da biz sııaqty máńgi ómir súrgenin qalaımyz. Sebebi adamdar bizge qaramasa bizdiń ómirimiz mánsiz bolar edi. Ár adamǵa aspandaǵy bir juldyz qamqorlyq jasaıdy.
Iıa, juldyzdar keıde aspan tórinen aǵyp túsip jatady. Onyń óz sebebi bar.
Adamdar biz sııaqty emes. Ózara tatý-tátti ómir súrýdi áli kúnge deıin úırene almaı keledi. Adamdar bir-biriniń kóńilin jıi qaldyrady. Sondaı kezde demeý bolý úshin biz juldyzdar jerge asyǵamyz. Juldyzdar adamdardy tatýlastyrýǵa tyrysady. Adamdar birin-biri keshirip qaıta jarasqan soń juldyzdar aspandaǵy óz ornyna qaıtady.
Al adamdar kórgenin kóbinese durys túsinbeı jatady. Juldyzdardyń aspannan jıi aǵyp túsip jatqanyn adamdardyń basqasha qabyldaýy bizge, juldyzdarǵa jaqsy túsinikti.
Búkil aspan balaǵa meıirlene qarap turdy.
Kóńili ornyna túsken balanyń júzi jarqyrap, juldyzdarǵa qaraı berdi.
Bala bárin túsindi. Ol juldyzdarǵa jymııa qarady. Juldyzdardyń qýanǵany da sonshalyq búkil aspan bal-bul janyp jarqyraı tústi.

Berdaly OSPAN.
Menin salgan suretim "Aily auen" dep atalady.
Meniń salǵan sýretim "Aıly áýen" dep atalady.
Moı rısýnok nazyvaetsıa "Lýnnaıa melodııa".

Berdaly OSPAN: Bir zamandastar osy ertegimdi Tànirlik ertegi dedi. Àr adamnyn qabyldauy àrturli goi.

Berdaly OSPAN: Bir zamandastar osy ertegimdi Táńirlik ertegi deıdi. Ár adamnyń qabyldaýy ártúrli ǵoı.

Berdaly OSPAN: Nekotorye skazalı, chto eta moıa skazka Tengrıanskaıa. Kajdyı ved po svoemý vosprınımaet.

Pikirler