ءبىر بالا كۇنىگە كەشكە قىرعا شىعىپ، جۇلدىزدى اسپانعا تامسانا قاراپ وتىرادى ەكەن. كوزدىڭ جاۋىن الارداي جارقىراعان جۇلدىزدارعا كوز تىگىپ وتىرىپ، ول تەزىرەك ۇلكەن بولسام ەكەن دەپ ارماندايدى ەكەن. ونىڭ كەلەتىنىن ءبىلىپ العان جۇلدىزدار بولسا بالانىڭ كوزىنە ءتۇسۋ ءۇشىن، وزدەرىنشە بويانىپ-تارانىپ الەككە تۇسەدى ەكەن. اتا-اناسىنا كومەكتەسىپ بولعان سوڭ قىر باسىنا شىعىپ كەلە جاتقان بالانىڭ جانىنان جاقىنىراق ورىنعا جايعاسۋ ءۇشىن، جۇلدىزدار اسپاندا شاشىراي جۇگىرەدى ەكەن.
ءبىر كۇنى بالا كوڭىلسىز، مۇڭايىپ وتىرىپتى. اسپانعا دا بۇرىنعىداي قاراماي ءجۇزىن تومەن سالا بەرىپتى. ادەتتە بالانى كورە سالىسىمەن كۇمىس كىرپىكتەرىن جىپىلىقتاتىپ جارىسا بيلەي جونەلەتىن جۇلدىزدار نە بولعانىن تۇسىنبەي ءۇنسىز قالىپتى.
اسپان ەشقاشان بۇنداي كوڭىلسىز جاعدايعا تۇسپەگەن ەكەن...
ۇنسىزدىكتى بالاعا جاقىن تۇرعان ءبىر جۇلدىز بۇزادى.
– بۇگىن كوڭىلسىزسىڭ عوي. نە بولدى؟ – دەپ سۇرايدى ول.
سوندا بالا:
– اسپاننان جۇلدىزدار اققاندا مەن سەندەر جاسىرىنباق ويناپ ءجۇر ەكەن دەپ ويلاۋشى ەدىم. بىراق، بۇگىن مەن قوزىلارىمدى باعىپ جۇرگەندە ءبىر جولاۋشى كەزدەستى. ول اسپاننان جۇلدىز اققاندا، وزىمەن بىرگە ءبىر ادامنىڭ جانىن الىپ كەتەدى، دەدى. بۇل قالاي بولعانى؟ سونداي قاتىگەز بە ەدىڭدەر؟ سەندەر سونداي ادەمىسىڭدەر، تۇندە اسپاندى جادىراتىپ اداسقاندارعا جول سىلتەيسىڭدەر، دەپ ويلاۋشى ەدىم. ەندى نە دەرىمدى بىلمەي وتىرمىن... مەن سەندەردەن بۇندايدى كۇتكەن جوق ەدىم...
وسى ساتتە بارلىق جۇلدىزدار ءبىر ساتكە اڭتارىلىپ ءبىر-بىرىنە قارادى دا بۇكىل اسپان كۇمىس كۇلكىگە كومىلدى. ولاردى اي دا قوستاپ اسپان قوڭىراۋلاتقان اۋەن جاڭعىرىعىنا بولەندى. سودان سوڭ اي جۇلدىزدارعا قوسىلىپ، ءبارى قول ۇستاسىپ دوڭگەلەنە بيلەي جونەلدى.
ەشتەڭە تۇسىنبەگەن بالا اي مەن جۇلدىزدارعا تاڭ قالا قاراي بەردى. قانشا ۋاقىت وتكەنى بەلگىسىز، ءبىر كەزدە جۇلدىزدار توقتاپ، بالاعا قاراپ تۇرا قالدى.
ءسال ۇنسىزدىك ورىن الدى. سودان ءبىر جۇلدىز بىلاي دەدى:
– ءبىز جۇلدىزدار ەشقاشان سونبەيمىز. جانە ادامداردىڭ دا ءبىز سياقتى ماڭگى ءومىر سۇرگەنىن قالايمىز. سەبەبى ادامدار بىزگە قاراماسا ءبىزدىڭ ءومىرىمىز ءمانسىز بولار ەدى. ءار ادامعا اسپانداعى ءبىر جۇلدىز قامقورلىق جاسايدى.
يا، جۇلدىزدار كەيدە اسپان تورىنەن اعىپ ءتۇسىپ جاتادى. ونىڭ ءوز سەبەبى بار.
ادامدار ءبىز سياقتى ەمەس. ءوزارا تاتۋ-ءتاتتى ءومىر ءسۇرۋدى ءالى كۇنگە دەيىن ۇيرەنە الماي كەلەدى. ادامدار ءبىر-ءبىرىنىڭ كوڭىلىن ءجيى قالدىرادى. سونداي كەزدە دەمەۋ بولۋ ءۇشىن ءبىز جۇلدىزدار جەرگە اسىعامىز. جۇلدىزدار ادامداردى تاتۋلاستىرۋعا تىرىسادى. ادامدار ءبىرىن-ءبىرى كەشىرىپ قايتا جاراسقان سوڭ جۇلدىزدار اسپانداعى ءوز ورنىنا قايتادى.
ال ادامدار كورگەنىن كوبىنەسە دۇرىس تۇسىنبەي جاتادى. جۇلدىزداردىڭ اسپاننان ءجيى اعىپ ءتۇسىپ جاتقانىن ادامداردىڭ باسقاشا قابىلداۋى بىزگە، جۇلدىزدارعا جاقسى تۇسىنىكتى.
بۇكىل اسپان بالاعا مەيىرلەنە قاراپ تۇردى.
كوڭىلى ورنىنا تۇسكەن بالانىڭ ءجۇزى جارقىراپ، جۇلدىزدارعا قاراي بەردى.
بالا ءبارىن ءتۇسىندى. ول جۇلدىزدارعا جىميا قارادى. جۇلدىزداردىڭ قۋانعانى دا سونشالىق بۇكىل اسپان بال-بۇل جانىپ جارقىراي ءتۇستى.
بەردالى وسپان.
Menin salgan suretim "Aily auen" dep atalady.
مەنىڭ سالعان سۋرەتىم "ايلى اۋەن" دەپ اتالادى.
موي ريسۋنوك نازىۆاەتسيا "لۋننايا مەلوديا".
Berdaly OSPAN: Bir zamandastar osy ertegimdi Tànirlik ertegi dedi. Àr adamnyn qabyldauy àrturli goi.
بەردالى وسپان: ءبىر زامانداستار وسى ەرتەگىمدى تاڭىرلىك ەرتەگى دەيدى. ءار ادامنىڭ قابىلداۋى ءارتۇرلى عوي.
بەردالى وسپان: نەكوتورىە سكازالي، چتو ەتا مويا سكازكا تەنگريانسكايا. كاجدىي ۆەد پو سۆوەمۋ ۆوسپرينيماەت.
