Búgingi tańda kópshilik «Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan baǵdarlamasy» boıynsha Jumyspen qamtý ortalyqtarynyń halyqqa qyzmet etip jatqanyn bilmeıdi. «Adyrna» ulttyq portaly bul ortalyq týraly tolyq málimetti nazarlaryńyzǵa usynady.
Jumyspen qamtý ortalyǵynyń maqsaty qandaı?
Halyqty jumyspen qamtý ortalyqtary halyqqa jáne jumys berýshilerge tegin qyzmet kórsetedi. Ortalyqtyń negizgi maqsaty - elimizdegi jumyssyzdyq máselesin joıýǵa atsalysyp, jumyspen qamtýǵa járdemdesýdiń belsendi sharalaryn júzege asyrý. Elimizde 200 halyqty jumyspen qamtý ortalyǵy bar.
Jumyspen qamtý ortalyǵy kimderge jumys usynady? Eńbekaqy mólsheri qansha?
Ortalyq 16 jastan bastap zeınetaqy jasyna deıingi jumyssyz azamattarǵa kómek kórsetedi. Eńbekaqy mólsheri - 85 000 teńge.
Jumyspen qamtý ortalyǵyna qalaı tirkeledi?
Jumys jasaýǵa nıeti bar jandar jumyspen qamtý ortalyǵyna barýy tıis. Olar tómendegi qujattardyń negizinde jumys izdep júrgen adam retinde tirkele alady:
1) jeke basyn kýálandyratyn qujat;
2) eńbek qyzmetin rastaıtyn qujat (bar bolǵan kezde);
3) bilimi, biliktiligi, arnaıy biliminiń nemese kásiptik daıarlyǵynyń bolýy týraly qujat (bar bolǵan kezde);
Tirkelgennen keıin ortalyq 10 jumys kúni ishinde azamatqa jumystyń tabylýyn kútedi.
Jumyssyz retinde onlaın túrde tirkelýge bola ma?
Iá. Izdenýshi elektrondyq ıfrlyq qoltańbasy (EQ) bolǵan kezde "elektrondyq úkimet" (egov.kz) veb-portaly arqyly elektrondyq nysanda jumys izdep júrgen adam retinde tirkele alady. Onyń derekteri avtomatty túrde tirkelgen jeri boıynsha jumyspen qamtý ortalyǵyna jiberiledi.
Belgili bir mamandyǵy (kásibi) joq adamdarǵa qandaı jumystar usynylady?
Jumyspen qamtý ortalyǵy mamandyǵy (kásibi) joq tulǵalarǵa ýaqytsha sıpattaǵy qoǵamdyq jumys oryndaryna, áleýmettik jumys oryndaryna jumysqa ornalasýdy jáne qysqa merzimdi kásiptik oqytýdan ótýdi usynady.
10 jumys kúni ishinde azamatqa laıyqty jumys tabylmasa, izdenýshi ne isteýi kerek?
Eger 10 jumys kúni ótkennen keıin, azamatqa sol ýaqyttyń ishinde jumysqa ornalasýy úshin laıyqty bos jumys oryndary tabylmaǵan jaǵdaıda,jumys izdeýshi kásiptik baǵdarlaý bólimine baryp, oqý úshin mamandyqty tańdaýǵa testileýden ótýi qajet.
Qysqa merzimdi kásiptik oqytý degenimiz ne?
Kásiptik oqytý eńbek naryǵynda suranysqa ıe mamandyqtar men daǵdylar boıynsha kásiptik daıarlaý, qaıta daıarlaý jáne biliktilikti arttyrýdy qamtıdy. Qysqa merzimdi kásiptik oqytýdan ótetin azamattar oqý, stıpendııa, jol júrý aqysyn tóleý boıynsha memlekettik qoldaýmen qamtamasyz etiledi. Oqytýdyń uzaqtyǵy mamandyqtyń erekshelikterine baılanysty bir aıdan alty aıǵa deıin quraıdy.
Jumys izdep júrgen adam ózine laıyqty jumystyń tabylǵanyn qalaı biledi?
Izdenýshi ózine laıyqty jumystyń bar ekeni týraly aqparatty jumyspen qamtý ortalyǵynyń qyzmetkerinen biledi. Ol laıyqty jumystyń bar ekeni týraly usynysty alǵannan keıin úsh jumys kúni ishinde jumyspen qamtý ortalyǵyna barýy kerek nemese baılanys quraldary arqyly usynylǵan laıyqty jumysqa kelisetini ıa odan bas tartatyny týraly habarlaýy tıis.
Dıana ASANOVA,
«Adyrna» ulttyq portaly
