بۇگىنگى تاڭدا كوپشىلىك «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 – 2021 جىلدارعا ارنالعان باعدارلاماسى» بويىنشا جۇمىسپەن قامتۋ ورتالىقتارىنىڭ حالىققا قىزمەت ەتىپ جاتقانىن بىلمەيدى. «ادىرنا» ۇلتتىق پورتالى بۇل ورتالىق تۋرالى تولىق مالىمەتتى نازارلارىڭىزعا ۇسىنادى.
جۇمىسپەن قامتۋ ورتالىعىنىڭ ماقساتى قانداي؟
حالىقتى جۇمىسپەن قامتۋ ورتالىقتارى حالىققا جانە جۇمىس بەرۋشىلەرگە تەگىن قىزمەت كورسەتەدى. ورتالىقتىڭ نەگىزگى ماقساتى - ەلىمىزدەگى جۇمىسسىزدىق ماسەلەسىن جويۋعا اتسالىسىپ، جۇمىسپەن قامتۋعا جاردەمدەسۋدىڭ بەلسەندى شارالارىن جۇزەگە اسىرۋ. ەلىمىزدە 200 حالىقتى جۇمىسپەن قامتۋ ورتالىعى بار.
جۇمىسپەن قامتۋ ورتالىعى كىمدەرگە جۇمىس ۇسىنادى؟ ەڭبەكاقى مولشەرى قانشا؟
ورتالىق 16 جاستان باستاپ زەينەتاقى جاسىنا دەيىنگى جۇمىسسىز ازاماتتارعا كومەك كورسەتەدى. ەڭبەكاقى مولشەرى - 85 000 تەڭگە.
جۇمىسپەن قامتۋ ورتالىعىنا قالاي تىركەلەدى؟
جۇمىس جاساۋعا نيەتى بار جاندار جۇمىسپەن قامتۋ ورتالىعىنا بارۋى ءتيىس. ولار تومەندەگى قۇجاتتاردىڭ نەگىزىندە جۇمىس ىزدەپ جۇرگەن ادام رەتىندە تىركەلە الادى:
1) جەكە باسىن كۋالاندىراتىن قۇجات;
2) ەڭبەك قىزمەتىن راستايتىن قۇجات (بار بولعان كەزدە);
3) ءبىلىمى، بىلىكتىلىگى، ارنايى ءبىلىمىنىڭ نەمەسە كاسىپتىك دايارلىعىنىڭ بولۋى تۋرالى قۇجات (بار بولعان كەزدە);
تىركەلگەننەن كەيىن ورتالىق 10 جۇمىس كۇنى ىشىندە ازاماتقا جۇمىستىڭ تابىلۋىن كۇتەدى.
جۇمىسسىز رەتىندە ونلاين تۇردە تىركەلۋگە بولا ما؟
ءيا. ىزدەنۋشى ەلەكتروندىق تسيفرلىق قولتاڭباسى (ەتسق) بولعان كەزدە "ەلەكتروندىق ۇكىمەت" (egov.kz) ۆەب-پورتالى ارقىلى ەلەكتروندىق نىساندا جۇمىس ىزدەپ جۇرگەن ادام رەتىندە تىركەلە الادى. ونىڭ دەرەكتەرى اۆتوماتتى تۇردە تىركەلگەن جەرى بويىنشا جۇمىسپەن قامتۋ ورتالىعىنا جىبەرىلەدى.
بەلگىلى ءبىر ماماندىعى (كاسىبى) جوق ادامدارعا قانداي جۇمىستار ۇسىنىلادى؟
جۇمىسپەن قامتۋ ورتالىعى ماماندىعى (كاسىبى) جوق تۇلعالارعا ۋاقىتشا سيپاتتاعى قوعامدىق جۇمىس ورىندارىنا، الەۋمەتتىك جۇمىس ورىندارىنا جۇمىسقا ورنالاسۋدى جانە قىسقا مەرزىمدى كاسىپتىك وقىتۋدان ءوتۋدى ۇسىنادى.
10 جۇمىس كۇنى ىشىندە ازاماتقا لايىقتى جۇمىس تابىلماسا، ىزدەنۋشى نە ىستەۋى كەرەك؟
ەگەر 10 جۇمىس كۇنى وتكەننەن كەيىن، ازاماتقا سول ۋاقىتتىڭ ىشىندە جۇمىسقا ورنالاسۋى ءۇشىن لايىقتى بوس جۇمىس ورىندارى تابىلماعان جاعدايدا،جۇمىس ىزدەۋشى كاسىپتىك باعدارلاۋ بولىمىنە بارىپ، وقۋ ءۇشىن ماماندىقتى تاڭداۋعا تەستىلەۋدەن ءوتۋى قاجەت.
قىسقا مەرزىمدى كاسىپتىك وقىتۋ دەگەنىمىز نە؟
كاسىپتىك وقىتۋ ەڭبەك نارىعىندا سۇرانىسقا يە ماماندىقتار مەن داعدىلار بويىنشا كاسىپتىك دايارلاۋ، قايتا دايارلاۋ جانە بىلىكتىلىكتى ارتتىرۋدى قامتيدى. قىسقا مەرزىمدى كاسىپتىك وقىتۋدان وتەتىن ازاماتتار وقۋ، ستيپەنديا، جول ءجۇرۋ اقىسىن تولەۋ بويىنشا مەملەكەتتىك قولداۋمەن قامتاماسىز ەتىلەدى. وقىتۋدىڭ ۇزاقتىعى ماماندىقتىڭ ەرەكشەلىكتەرىنە بايلانىستى ءبىر ايدان التى ايعا دەيىن قۇرايدى.
جۇمىس ىزدەپ جۇرگەن ادام وزىنە لايىقتى جۇمىستىڭ تابىلعانىن قالاي بىلەدى؟
ىزدەنۋشى وزىنە لايىقتى جۇمىستىڭ بار ەكەنى تۋرالى اقپاراتتى جۇمىسپەن قامتۋ ورتالىعىنىڭ قىزمەتكەرىنەن بىلەدى. ول لايىقتى جۇمىستىڭ بار ەكەنى تۋرالى ۇسىنىستى العاننان كەيىن ءۇش جۇمىس كۇنى ىشىندە جۇمىسپەن قامتۋ ورتالىعىنا بارۋى كەرەك نەمەسە بايلانىس قۇرالدارى ارقىلى ۇسىنىلعان لايىقتى جۇمىسقا كەلىسەتىنى يا ودان باس تارتاتىنى تۋرالى حابارلاۋى ءتيىس.
ديانا اسانوۆا،
«ادىرنا» ۇلتتىق پورتالى
