Adam balasy osy qıyndyǵy men qyzyǵy qatar júretin mynaý dúnıede qansha jyl ómir súrsede, qandaı ispen aınalyssa da ómirindegi eń bir umytylmas kezder ýnıverıstet qabyrǵasyndaǵy keremet shaqtar. 2015 jyly mektebinen túlep ushqan jas túlektermen qatar men de osy bir keremet kezeńniń tabaldyryǵyn attap, balalyq shaqpen qoshtasyp , jańa bir beleske aıaq bastym. Meniń Alataýdaı asqaq armanym meni Almaty shaharyna, Ál – Farabı atyndaǵy Qazaq Ulttyq ýnıversıtetine jeteledi. Osydan birneshe jyl buryn armanyma aınalǵan bilim ordasy , qazirgi kezde shyndyqqa aınalyp, sonaý arý qalam- Aqtóbeden at terletip, arman qala – Almatyǵa bas tiregen jaıym bar. Men ýnıversıtettiń esigin aıqara ashqan kúnnen bastap, meni jańa álem, jańa adamdar, jańa dostar, jańa múmkindikter kútip turǵanyn oǵan qosa moınymda úlken jaýapkershiliktiń baryn sezindim. Óıtkeni osyndaı zańǵar ýnıversıtettiń stýdenti ataný árkimge buıyra bermes baq dep bilemin. Al endi osy basyma qonǵan baqty aıalaý ári qaraıǵy meniń basty mindetim. Ál – Farabı babamyz óz sózinde: «Baqytqa jetkizetin erkin áreket — tamasha áreket» degendeı, sol tamasha árekettiń biri – ol bilimge degen qushtarlyq dep sanaımyn.
Ýnıversıtet qabyrǵasynda oqyp júrgenime bes jyl. Osy bes jyldyń meniń ómirimdegi esten ketpes, sanada máńgi qalar, júrekten oryn alar eń tamasha kezder. Ýnıversıtetke aıaq tiregeli beri ózimdi naǵyz telegeı teńiz bilim ordasyna, jalyndy jastardyń qataryna engenime óte qatty qýanamyn ári maqtanyshpen aıtamyn. Óıtkeni, elbasymyz Nursultan Ábishuly Nazarbaev elimiz ben bizdiń jastarymyzdyń basty baılyǵy — sapaly bilim ekenin óziniń sóılegen sózderinde birneshe ret atap kórsetken bolatyn. Osy sapaly bilimniń qara shańyraǵy, Qazaqstandaǵy bilim berý júıesiniń tiregi, eskiniń kózin kórgen, 85 jyldyq baı tarıhy jınaqtalǵan ulttyq ýnıversıtette elimizdiń túkpir túkpirinen, alys - jaqyn shet elderden kelip, oqyp jatqan stýdentter jeterlik. Búginde Ál-Farabı atyndaǵy QazUÝ erekshe mártebesi bar Qazaqstannyń jetekshi , nómeri birinshi ýnıversıteti, sonymen qatar bilim men ǵylymnyń ulttyq kóshbasshysy. Jaqynda Qazaq ulttyq ýnıversıteti «QS World University Ranking by Subject 2020» pándik reıtıngisiniń qorytyndysy boıynsha «Zamanaýı til bilimi» mamandyǵy boıynsha álemniń eń úzdik 100 JOO qataryna endi.
Ýnıversıtet qabyrǵasynda jan – jaqty, biliktiligi joǵary, qazaqtyń keremet aqyn – jazýshylarynyń aldyn kórgen, sol uly kisilerden dáris alǵan oqytýshy-professorlar, ǵylym doktorlary, ǵylym kandıdattary, doentter qyzmet atqarady.
Ál-Farabı atyndaǵy Qazaq ulttyq ýnıversıteti 180-nen astam gýmanıtarlyq, jaratylystaný jáne tehnıkalyq mamandyqtar boıynsha bakalavrlardy, magıstranttardy, doktoranttardy daıyndaıdy. Ýnıversıtetimizde 16 fakýltet shoǵyrlanǵan.Osy jerde bilim alatyn barsha stýdentter úshin jan-jaqty damý úshin, kóshbasshylyq qabiletti qalyptastyrý maqsatynda, óz-ózin kemeldendirip, erkin, zamanaýı damytý úshin bar jaǵdaı jasalǵan. Sol bar múmkinshilikti paıdalana bilý, ár stýdenttiń óz qolynda. Máselen, ınternet ortalyǵy, Ó.A. Joldasbekov atyndaǵy stýdentter saraıy, murajaı, tamaqtandyrý kombınaty, stýdentterge qyzmet kórsetý ortalyǵy «Keremet», kompıýterli-tehnıkalyq jabdyqtar, WI-FI symsyz ınternet jelisi , aýqymy keń sporttyq keshen syndy ortalyqtar ornalasqan. Onymen qosa eń baı kitaphana - Ál-Farabı kitaphanasy ornalasqan. Qoınaýy kitapqa baı, záýlim saraıly kitaphanamyzda ár stýdent óziniń keregine esh qıyndyqsyz qol jetkize alady .
Ýnıversıtettiń ereksheligi jáne eń qolaıly tusy – stýdentter úıi de, barlyq fakýltet ǵımaraty da, joǵaryda atalǵan keshenderdiń barlyǵy bir qalashyqtyń ishinde ornalasqandyǵy. Qalashyqtyń tabıǵatyn sózben aıtyp jetkizý múmkin emes! Aınala qorshalǵan jasyl jelekti aǵashtar, hosh ıisti gúlder,saf, taza aýasy, eń bastysy shyńy aspanmen talasqan zańǵar Alataý ornalasqan. Sol Alataýdyń shyńy ár stýdentti, jalpy ár adamdy bıikke jeteleıtindeı kórinedi.
Men osy ýnıversıtettiń eń ejelgi fakýltetteriniń biri – fılologııa jáne álem tilder fakýltetiniń, qazaq fılologııasy mamandyǵy boıynsha tórt jyldyq joǵary bilimimdi alyp qazir osy bilim ordasynyń magıstranty atandym. Men úshin janyma eń jaqyn, jyly mekenge aınalǵan. Bul fakýltettiń tarıhı qoınaýy óte baı fakýltetterdiń biri. Sebebi,osy qara shańyraqta qazaqtyń ǵulamalary qyzmet atqarǵan . Olardyń qatarynda: álem ádebıetiniń klassıgi Muhtar Omarhanuly Áýezov, Qazaqstan Respýblıkasynyń Ulttyq Ǵylym Akademııasynyń akademıgi, halyq jazýshysy, fılologııa ǵylymdarynyń doktory, professor Zeınolla Qabdolov , áıgili ǵalym, fılologııa ǵylymdarynyń doktory Beısembaı Kenjebaev, belgili ǵalym, fılologııa ǵylymdarynyń doktory Tursynbek Kákishuly, fılologııa ǵylymdarynyń doktory, professor, etnograf, áıgili S.Aronulynyń shóberesi Sultanǵalı Sadyrbaev syndy t.b. osyndaı iri tulǵalardyń izi, rýhy bar ýnıversıtette oqyp, bilim alǵan adam rýhanı, mádenı turǵydan baıyp shyǵatyny sózsiz. Qazirgi tańda bilim ordasynda stýdentter arasynda ot jalyndy, oraq aýyzdy aqyndar, qalamy ushqyr jazýshylar da jeterlik.
Bul meniń ýnıversıtetimdi asyra maqtaǵanym emes, bunyń barlyǵy shynaıylyqpen, mahabbatpen jazylǵan shynaıy dúnıe. Meniń osy ýnıversıtette alǵan bilimim bıik shyńǵa jetelip kele jatqanyna jáne ómirden, ǵylym jolynan óz ornymdy oıyp turyp tabýǵa jeteleıtinine úlken senimmen qaraımyn. Maǵjan Jumabaev : «Arystandaı aıbatty, jolbarystaı qaıratty, Men jastarǵa senemin!», - demekshi arystandaı aıbatty, jolbarystaı qaıratty jastardyń otany – Ál – Farabı atyndaǵy Qazaq ulttyq ýnıversıteti!
Jansulý Amanjanova
Ál – Farabı atyndaǵy qazaq ulttyq ýnıversıteti
Fılologııa jáne álem tilderi fakýltetiniń
1-kýrs magıstranty
Kýrator-edvaızeri fılologııa ǵylymdarynyń kandıdaty, doent L.T.Álimtaeva
