Qytaıdyń Altaı aımaǵyna qarasty Býyrshyn aýdany, Egiztóbe aýylynda elektrık bolyp jumys isteıtin Bolatbek Qarymqanuly eń kishkentaı dombyra jasap, qazaqtyń atyn taǵy bir aspandatty. 29 jasar sheber jigittiń qolynan shyqqan shynashaqtaı saz aspaby Gınnestiń rekordtar kitabyna enip, 01-1201-09541 nómirli kýálikke ıe boldy.
El sheti, jel ótinde júrgen qandastarymyz ult muralaryn ulyqtaý úshin osyǵan deıin bir mezgilde 13 myń 288 adam «Qara jorǵa» bıin bılep, 10 450 dombyrashy kúı tartyp, mıllıardtardyń ishinen top jarǵan edi. Sondaı-aq sozsań qolyń, qushaqtasań qushaǵyń jetpeıtin, esik pen tórdeı dombyra jasap, aıdy aspanǵa bir-aq shyǵarǵany da belgili. Endi mine, eń kishkentaı qolóner týyndysymen talaılardy tamsandyryp, tórtkúl dúnıeniń nazaryn tól muramyzǵa aýdaryp otyr.
Bala kúninen eki qoly tynym tappaıtyn Bolat Qarymqanuly aǵashtan oıý oıyp, túrli buıym jasaýdy janyna serik etip, ádetke aınaldyrǵan. Qoly qalt etkende ǵalamtor betterin aqtaryp, tańǵajaıyp týyndylar jaıly derekter oqyǵandy durys kóredi. Osyndaı bir ózindik izdenis ústinde basqa ulttardyń aspaptary túr-túrimen tolyp turǵanyn baıqaıdy. Al qazaqtyń dombyrasyn múlde taba almapty. Sóıtip, ózi qolǵa almaqqa bekinedi. Bastapqyda «aqyry kirisken soń, úlken etip bir-aq jasaıyn» dep oılaıdy. Alaıda oǵan qomaqty qarajat ketetindikten, murshasy kelmeıdi. Dál sol tusta ákesi de naýqastanyp, jıǵan-tergenin jumsap qoıady. Degenmen alǵan betinen qaıtpaı, neǵurlym shaǵyn etip jasaýǵa bel býady. Áýeli dombyranyń syrtqy qabyn jonyp, daıarlap alypty. Sodan keıin aspaptyń ózine kóshedi.
Uzyndyǵy — 4,5 santımetr, eni — 1,4 santımetr, bıiktigi — 1,2 santımetr ǵana bolatyn qos ishekti ınemen shertip, oınaýǵa bolady. Daýysy durys shyǵý úshin qarajıde aǵashyn alyp, árbir bólshegin jeke jonyp, bir-birimen qııýlastyryp otyrady. Syrt pishinin qazaqy oıý-órnekterimen bezendirip, áspetteı túsedi.
Gınnestiń rekordtar kitabyna enýdiń talaptaryna saı etip, erejelerinen aýytqymaýǵa tyrysqan sheber bul iske bir aı ýaqyt jumsaıdy. Kózdegen maqsatyna qol jetkizgen soń, 2011 jyldyń qarashasynda Qytaıdaǵy Gınnestiń rekordtaryn saralaıtyn kommıssııanyń talqysyna usynady.
«Azattyq» radıosynyń tilshisine telefon arqyly bergen suhbatynda:
- Kishkentaı kezimnen túrli buıymdar jasaýǵa qumartatynmyn. Biraq óse kele basqa mamandyqty tańdaýǵa týra keldi. Qazir energetıka salasynda jumys isteımin.
Osydan bir aı buryn shamasynda dombyramnyń Gınnestiń rekordtar kitabyna №01-1201-09541 bolyp tirkelgeni týraly sertıfıkat aldym. Qýanyshymda shek joq. Jiberýin jibersem de ýaqyt ótken saıyn kúderimdi úze bastaǵan edim. Eki ishekti toǵyz perneli kishkentaı dombyrany qolmen oınaý múmkin emes, biraq komıssııa saraptamasy boıynsha kúı tartýdyń barlyq talaptaryna saı kepti, — deıdi ol.
Qanshaıym BAIDÁÝLET, «Aıqyn».
