– Osy sen orysqa, ne qaýynnyń shónegin tartyp otyratyn dúngenniń balasyna ketersiń, – dep sheshem qolymdaǵy sabaýdy julyp alyp, júndi burqyldata sabaı jóneldi. Bir shókim bult jerden kóterile berip, qaıta sylq ete túskendeı. Týlaqtyń jan-jaǵyna shashyramaıdy da. Jyp-jınaqy. Men batylsyzdana qaıtadan sabaýdy qolyma alam. Sabaýdyń ushyna ilingen jún aıdalaǵa shashylyp qala beredi. Abysyndarynyń kózinshe qaıta-qaıta eskertý jasaýdan uıalady bilem, janyma kelip otyrǵan bolyp, batyryp-batyryp shymshyp ketedi.
– Ala qaǵazdyń betine qaraımyn dep osy balam súleısapa bireý bolyp ósip keledi. Barǵan jerinen úsh kúnnen keıin qaıtyp kelip ala ma dep qorqam, – sheshem endi aýyl áıeliniń sasyq qýlyǵyna salyp meni jamandaǵan bolyp, kelinderine de tıisip alady. Iyǵym ýdaı ashyǵanymen, áni-mini degenshe-aq týlaqtaǵy kúzem júndi úlpildete sabap, jumysyma beıimdelip-aq alam.
– Tıiserge qara tappaısyz-aý deımin, áıtpese qara qyzdyń sabaǵan júni anaý-mynaý jaman qatynnyń murnynan monshaǵyn túsirip tútken júninen artyq, – dep sózimdi sóılep, kóńilimdi kótereıin degen jeńgeme.
– Kindik sheshesi tatar emes pe, kóńili kelse áp-sátte alyp soǵyp, tyndyrymdy isteıdi de, kóńili kelmese kúıbeńdep júrip alady, – apam meni maqtaýǵa beıildi emes ekenin bildirip, júnge jabysqan shóp-shalamdy tazalap, shı ústine ádemilep, áspettep jaıady. Shabaqtaýǵa abysyndaryn túgel shaqyra qoımaıdy. Ala-qula isteıdi-aý degenderin qazan basyna jumsap, janyna jumysqa tyńǵylyqtylaryn ǵana alyp qalady. Júnniń betine ystyq sý sebýge men de qalam. Maqtap qoısa arsalańdap tyndyrymdy isteıtinimdi biledi, biraq pise tússin deı me, meniń arqamnan qaǵýǵa kóp qulyqty emes. Júndi shıge orap, eki-úsh jerinen arqanmen baılap, endi ersili-qarsyly domalata tartqylaıdy. Osy jerde áıelderdiń kúlkisi de, bir-birine qaǵytpalary da kóbeıedi. Jún qylshyqtary shı syrtyna shyqqanda shıdi jazyp, kıizdi bólek alady. Endi bilekteý bastalady, basqa aýylda qaıdam, bizdiń aýylda erkek-áıeli qatar otyra qalyp, bilekteri kúldiregenshe «kıiz pysyı tússin» dep basady. Men osy jerde óz jumysymdy bittige sanap, ornymnan turyp, ońashalaý jerge baryp otyram. Jaı turmaımyn, pále baǵyp turamyn. Aǵamnyń jeńgemdi joqtan ózgeden qyzǵana beretinin bilemin. Oǵan ózim ishteı qatty kúlkim keledi. Qazir de tizerlep otyrǵanda burymy aldyna túse bergen soń, silkip qalyp arqasyna jibereıin dep edi, ıyǵy kórshimiz Tursynnyń ıyǵyna tıip ketti. Ol kisi táteme meıirlene qarap, jymıyp qoıdy. Shyndyǵyna kelgende jeńgemdi jaqsy kórmeý múmkin emes edi. Men aǵama jalt qaradym. Qabaǵy túıilip, júzi kúreńitip ketipti. Men óz-ózimnen kúlip jiberdim.
– Osy bireýdiń qyz sıqy joq. Shaıtan túrtip tur ma seni, – aǵam sátte kelgen ashýyn menen aldy. Esh nárseden habary joq jeńgem eki burymy aldyna túsip, bilegi qyzaryp bar peıilimen basylyp jatqan kıizdi bilekteýde.
– Qyryq jylda da irimeıtin buıym boldy, – áıelder bir kúngi tirlikterine táýbe aıtysyp, qoıý sháıge bas qoıysty.
Aǵam men jeńgem úıge kirip ketip, qaıtyp shyqpaı qoıdy, ańdyǵanym aǵam bolǵasyn ba, men túsine qoıdym da, jeńgemdi joqtatpaı etke nan ıleı bastadym. Qulaǵyma jeńgemniń:
– Osy seniń aǵań nege sonsha qyzǵanshaq? – dep kúle qaraǵan daýysy estildi.
Shyndyǵynda aǵam kimge tartyp sonsha qyzǵanshaq boldy eken? Qaıta jeńgemniń sonshama bir názik, úlbiregen denesimen kıiz basqanyna qýanbaı ma?..
Dildár MAMYRBAEVA
