Reseı áskeri jeksenbige qaraǵan túni Ýkraınaǵa qarsy taǵy bir jappaı drondyq shabýyl jasady, dep habarlaıdy "Adyrna" ulttyq portaly. Bul týraly Ýkraına Qarýly Kúshteriniń Áýe kúshteri málimdedi.
Olardyń aıtýynsha, tún ishinde Ýkraınaǵa jalpy sany 103 Shahed ushqyshsyz ushaǵy men basqa da túrdegi drondar jiberilgen. Ýkraınanyń áýe shabýylyna qarsy qorǵanysy Poltava, Sýmy, Harkov, Kıev, Chernıgov, Cherkassy, Kırovograd, Jıtomır, Dnepropetrovsk, Herson, Nıkolaev jáne Zaporoje oblystarynda 52 drondy atyp túsirgen.
Ýkraına Qarýly Kúshteriniń málimeti boıynsha, taǵy 44 dron baǵytyn ózgertip, jerge zaqym keltirmegen. Bir dron Belarýsqa qaraı ushyp ketken. Sonymen qatar, Herson baǵytyna Qyrymnan "Iskander-M" ballıstıkalyq zymyrany ushyrylǵany tirkeldi.
Ýkraına Qarýly Kúshteriniń málimetinshe, Reseı shabýyly saldarynan Herson, Nıkolaev, Chernıgov, Sýmy, Jıtomır jáne Kıev oblystarynda zaqym kelgen.
"Jeke kásiporyndar, kópqabatty úıler jáne azamattardyń múlikteri búlingen", – dep málimdedi Ýkraına Áýe kúshteri.
Ýkraına Tótenshe jaǵdaılar qyzmetiniń aqparaty boıynsha, Kıev oblysyndaǵy Brovary qalasynda dron synyqtary 25 qabatty turǵyn úıge qulap, órt bastalyp, turǵyndar evakýaııalanǵan. Zardap shekkender joq.
Herson oblysynyń áskerı ákimshiliginiń basshysy Aleksandr Prokýdın túngi shabýyl saldarynan óńirde 22 jeke úıdiń búlingenin habarlady. Bir adam qaza taýyp, altaýy jaraqat alǵan. Olardyń arasynda bir bala bar.
