Täjıkstan basşysy Duşanbede ötken mūzdyqtardy saqtau jönındegı alǧaşqy halyqaralyq joǧary deŋgeidegı konferensiiada söz söiledı, dep habarlaidy “Adyrna” ūlttyq portaly.
Prezidenttıŋ aituynşa, mūzdyqtar — auyz sudyŋ negızgı közı. Sondyqtan olardy saqtau — ornyqty damu maqsattaryna qol jetkızudıŋ maŋyzdy şarty. Mūzdyqtardyŋ eruı äsırese tauly aimaqtardaǧy sel, köşkın men su tasqyndaryn köbeitıp, infraqūrylymǧa aitarlyqtai zalal keltıredı.
Bügınde Täjıkstandaǧy 14 myŋ mūzdyqtyŋ 1300-ı tolyq erıp ketken. Būl ürdıs toqtausyz jalǧasuda. Rahmon älem elderın mūzdyqtardy zertteitın ǧylym salalaryn qoldauǧa jäne «Kriosfera ǧylymdary boiynşa ıs-qimyl onjyldyǧyn» jüzege asyruǧa şaqyrdy.
Sondai-aq, Emomali Rahmon mūzdyqtardy saqtau üşın mynadai ūsynystaryn bıldırdı. Iаǧni, halyqaralyq qauymdastyqtyŋ mūzdyqtardyŋ maŋyzdylyǧy turaly habardarlyǧyn arttyru qajet. Ǧylymi-zertteu ūiymdary men azamattyq qoǧam ökılderın tartu arqyly halyqaralyq yntymaqtastyqty küşeitu, mūzdyqtardyŋ eru prosesın keşendı zertteu qajettılıgı tuyndap tūr. Sondai-aq, äleumettık-ekonomikalyq saldarǧa qarsy bırlesken şaralar qabyldau kerek.
«Bızdıŋ basty maqsatymyz — osy ömırlık maŋyzy bar resurstardy qazırgı jäne bolaşaq ūrpaq üşın saqtau», — dedı Emomali Rahmon.
Ūqsas jaŋalyqtar
