تاجىكستان باسشىسى دۋشانبەدە وتكەن مۇزدىقتاردى ساقتاۋ جونىندەگى العاشقى حالىقارالىق جوعارى دەڭگەيدەگى كونفەرەنتسيادا ءسوز سويلەدى، دەپ حابارلايدى “ادىرنا” ۇلتتىق پورتالى.
پرەزيدەنتتىڭ ايتۋىنشا، مۇزدىقتار — اۋىز سۋدىڭ نەگىزگى كوزى. سوندىقتان ولاردى ساقتاۋ — ورنىقتى دامۋ ماقساتتارىنا قول جەتكىزۋدىڭ ماڭىزدى شارتى. مۇزدىقتاردىڭ ەرۋى اسىرەسە تاۋلى ايماقتارداعى سەل، كوشكىن مەن سۋ تاسقىندارىن كوبەيتىپ، ينفراقۇرىلىمعا ايتارلىقتاي زالال كەلتىرەدى.
بۇگىندە تاجىكستانداعى 14 مىڭ مۇزدىقتىڭ 1300-ءى تولىق ەرىپ كەتكەن. بۇل ءۇردىس توقتاۋسىز جالعاسۋدا. راحمون الەم ەلدەرىن مۇزدىقتاردى زەرتتەيتىن عىلىم سالالارىن قولداۋعا جانە «كريوسفەرا عىلىمدارى بويىنشا ءىس-قيمىل ونجىلدىعىن» جۇزەگە اسىرۋعا شاقىردى.
سونداي-اق، ەمومالي راحمون مۇزدىقتاردى ساقتاۋ ءۇشىن مىناداي ۇسىنىستارىن ءبىلدىردى. ياعني، حالىقارالىق قاۋىمداستىقتىڭ مۇزدىقتاردىڭ ماڭىزدىلىعى تۋرالى حاباردارلىعىن ارتتىرۋ قاجەت. عىلىمي-زەرتتەۋ ۇيىمدارى مەن ازاماتتىق قوعام وكىلدەرىن تارتۋ ارقىلى حالىقارالىق ىنتىماقتاستىقتى كۇشەيتۋ، مۇزدىقتاردىڭ ەرۋ پروتسەسىن كەشەندى زەرتتەۋ قاجەتتىلىگى تۋىنداپ تۇر. سونداي-اق، الەۋمەتتىك-ەكونوميكالىق سالدارعا قارسى بىرلەسكەن شارالار قابىلداۋ كەرەك.
«ءبىزدىڭ باستى ماقساتىمىز — وسى ومىرلىك ماڭىزى بار رەسۋرستاردى قازىرگى جانە بولاشاق ۇرپاق ءۇشىن ساقتاۋ»، — دەدى ەمومالي راحمون.
ۇقساس جاڭالىقتار
