Täjıkstan prezidentı Emomali Rahmon älemdık qauymdastyqty mūzdyqtardyŋ eruı jäne teŋız ben mūhit ekojüiesınıŋ naşarlauyna nazar audaruǧa şaqyrdy. Būl turaly ol BŪŪ Bas Assambleiasynyŋ 80-sessiiasynda mälımdedı, dep habarlaidy «Adyrna» tılşısı.
Ol bügınde Täjıkstandaǧy 14 myŋ mūzdyqtyŋ 1300-den astamy joiylyp ketkenın jetkızdı. Aituynşa, eru prosesı jyldan-jylǧa küşeiıp jatyr. Al mūzdyqtar men özge de su közderı Ortalyq Aziiadaǧy su resurstarynyŋ 60%-yn qūraidy.
«Bız adamzattyŋ ömır közı – suǧa qatysty mäselelerdı şeşude beijai qalmauymyz kerek», – dedı Rahmon.
Ol osy saladaǧy Täjıkstan äzırlegen bastamalar men praktikalyq şaralarǧa nazar audaryp, müddelı memleketterdı kelesı jyly ötetın «Duşanbelık su prosesıne» belsendı qatysuǧa şaqyrdy.
Odan bölek, Täjıkstan basşysy daular men qaqtyǧystardy saiasi-diplomatiialyq jolmen şeşu qajettıgın atap öttı. Ol Palestina daǧdarysyn eŋseru jäne Taiau Şyǧysta beibıtşılık ornatu tek BŪŪ qararlary men «ekı memleket» qaǧidasyn oryndau arqyly mümkın bolatynyn aitty. Sondai-aq Rahmon Gaza sektorynda atysty dereu toqtatuǧa jäne jergılıktı halyqty gumanitarlyq kömekten tys qaldyrmauǧa şaqyrdy.
Prezident Auǧanstandaǧy beibıtşılık, tūraqtylyq, qauıpsızdık pen äleumettık-ekonomikalyq damudy qamtamasyz etudıŋ maŋyzdylyǧyna da toqtaldy. Onyŋ aituynşa, sifrlyq tehnologiialardy jedel engızu jäne jasandy intellektını dūrys paidalanu Tūraqty damu maqsattaryna jetude, sondai-aq ūjymdyq qauıpsızdıktıŋ maŋyzdy bölıgı sanalatyn kiberqauıpsızdıktı nyǧaituda ülken röl atqara alady. Būl salada BŪŪ qūrylymdary, äsırese Terrorizmge qarsy basqarma, müşe memleketterge qoldaudy küşeituı qajet.
Sondai-aq Rahmon ırı jäne şaǧyn memleketterdıŋ teŋ qūqyqtaryn qamtamasyz etu – jahandyq yntymaqtastyqtyŋ basty qadamdarynyŋ bırı ekenın aitty. Ol damuşy elderdıŋ, äsırese tauly aimaqtarda ornalasqan jäne teŋızge şyǧa almaityn memleketterdıŋ kürdelı jaǧdaiyn eskerıp, olardyŋ tūraqty damuyn qarjylandyru men qarjy közderıne qol jetkızuıne jaǧdai jasauǧa şaqyrdy.
