Túrkistan: Qytaılyq kompanııa Arysta birlesken jańa zaýyt salýǵa nıetti

1103
Adyrna.kz Telegram

Túrkistan oblysynyń ákimi Darhan Satybaldy qytaılyq «Zhejiang Navas Industry and trade Co LTD» kompanııasynyń basshylarymen kezdesti. Olar Túrkistan oblysynan jylý júıesine arnalǵan alıýmınıı radıatorlaryn, eden aralyq jylytý konvektory (teplyı pol), gaz qazandyqtaryn shyǵaratyn álemdik standartqa saı kásiporyn salýǵa nıetti. Jobanyń jalpy quny 10 mln. AQSh dollaryn quraıdy.

Oblys ákimi Darhan Amangeldiuly qonaqtarǵa aldymen óńirdiń áleýmettik ekonomıkalyq damýy jaıynda aıtyp berdi. Onyń barysynda qytaılyqtar úshin tıimdi tustaryna basa nazar aýdaryldy. Ol Memleket basshysy Qasym-Jomart Toqaevtyń aýyl sharýashylyǵy salasyna, qaıta óńdeý isin damytýǵa, jańa óndiristik jobalardy júzege asyrýǵa erekshe basymdyq berip jatqanyn atap ótti. Óńirdiń erekshelikterine toqtalyp, jaqynda bolǵan Qytaı sapary nátıjesinde júzege asatyn birlesken jobalarmen bólisti. Jańa jobalardy jan-jaqty qoldaýǵa, memleket tarapynan kórsetilýi tıis qoldaýlardy usynýǵa ázir ekenin bildirdi.

Taraptar ınfraqurylymdy damytý jumystaryn talqylady. Oblys basshysy Túrkistan óńirinde júzege asyp jatqan aýqymdy jobalarǵa toqtaldy.
Óz kezeginde qytaı ınvestory Túrkistan óńiriniń damý baǵytyn joǵary baǵalap, «Bir beldeý, bir jol» jobasy aıasynda jańa jobany iske asyrýǵa daıyn ekenin aıtty. Zaýyt ónimi halyq suranasyna oraı júzege asyrylatynyn atap ótti.

Pikirler