Aqtaýda zaýyttyń jumysshylary qyzmetterinen aıyrylǵany úshin narazylyq bildirip, ereýilge shyqty, dep habarlaıdy "Adyrna" ulttyq portaly.
Informbıýro málimetinshe, munaı qubyrlaryn shyǵaratyn kásiporyn basshylyǵy eki ehty Jańaózen qalasyna kóshirmek bolǵan. Aqtaýdaǵy ehte eńbek etken 250 adamǵa basqa jumys izdeı berińder dep eskertipti. Al qyzmetkerler basshylyqtyń aldyn ala eskertýsiz, shuǵyl sheshim shyǵarǵanyna narazy.
“Bul jerde 7 jyl, 10 jyldan beri jumys istep jatqan adamdar bar. Shtatqa aýyspaǵan, GPH-men jumys istep kele jatyr. Endi mekemeni bular Jańaózenge kóshirip jatyr. Osy ýaqytqa deıin bizdi “alyp ketemiz” dep aldap keldi. Endi “eshqaısysyń ketpeısińder, demala berińder” dep otyr. Bir aı buryn aıtyldy”, – dedi jumysshy Sergeı Jumahanov.
Narazylyqqa shyqqandardyń basym bóligi úıiniń jalǵyz asyraýshysy ekenin aıtyp, shaǵymdanýda.
“Qańtardan bastap jumys istep jatyrmyz. Biraq bizge kelisimshart bergen joq. Kelisimshart jeltoqsanda bitti. Ony suraǵan kezde “bermeımiz, jumys toqtap jatyr” dedi. Osyndaı jaǵdaı bolyp tur ǵoı. Bir kúnde 200-den asa adamdy jumystan shyǵardy”, – dedi jumysshy Jeńisbek Taǵanov.
Ereýilden soń zaýyttyń baspasóz qyzmeti másele sheshilgenin málimdedi.
“2025 jyldyń 6 aqpan kúni "KaskorMashzavod" JShS aýmaǵynda kompanııa qyzmetkerleri jınalyp, beıneúndeý jarııalady. 7 aqpanda taraptar ózara mámilege kelip, jumysshylardyń narazylyǵyn týdyrǵan barlyq másele sheshildi. Qazir qyzmetkerler jumysqa qaıta kiristi”, – dedi "Kaskor-Mashzavod” JShS baspasóz qyzmeti.
