Qazırgı qoǧamda smartfon ömırdıŋ ajyramas bölıgıne ainaldy. Alaida ony şekten tys paidalanu jaŋa äleumettık problemanyŋ – fabbingtıŋ keŋ taraluyna äkelude. Fabbing degenımız – äŋgımelesıp otyrǧan adamdy elemei, nazardy telefonǧa audaru. Būl qūbylys äsırese jasöspırımder arasynda jiı baiqalady.
Termin «phone» (telefon) jäne «snubbing» (elemeu) sözderınen şyqqan. Mamandardyŋ aituynşa, fabbing kezınde adam söilesu üstınde smartfondy qaita-qaita tekserıp, virtualdy aqparatty şynaiy qarym-qatynastan joǧary qoiady. Kei jaǧdaida telefonǧa berılgen adam ainalasynda otyrǧan jandardy mülde ūmytyp ketuı mümkın.
Zertteulerge süiensek, adamdardyŋ 17 paiyzy künıne kemınde tört ret fabbing jasaitynyn, al 32 paiyzy oǧan tūraqty türde tap bolatynyn jetkızgen. Psihologtar būl ädettıŋ tūlǧaaralyq qatynasqa kerı äser etetının aitady. Äŋgımelesuşı özın qajetsız sezınıp, tüsınbeuşılık pen renış paida bolady. Sonymen qatar fabbing qūrmetsızdık pen nazarsyzdyq belgısı retınde qabyldanady.
Jasöspırımderdıŋ fabbingke beiım boluyna äleumettık jelıdegı jaŋalyqtardan qalmau nietı, virtualdy ortada özın senımdı sezınu, mazasyzdyqty smartfon arqyly jeŋu talpynysy jäne märtebelık bäseke sebep boluda.
«Örken» balalardy qoldau ortalyǧy psihologı Sofiia Başkaevanyŋ aituynşa, ata-analar eŋ aldymen balanyŋ telefonǧa ne sebeptı jiı alaŋdaitynyn tüsınıp, aşyq dialog ornatuy tiıs. Sondai-aq jasöspırımderge sport, şyǧarmaşylyq, volonterlık siiaqty balama äreketter ūsynyp, üide gadjet qoldanuǧa qatysty ortaq erejeler belgıleu maŋyzdy.
Mamandar fabbingten arylu üşın as kezınde telefondy qoldanbau, onlain jäne oflain uaqytty josparlau, dostarmen kezdeskende smartfonsyz boluǧa kelısu sekıldı daǧdylardy qalyptastyrudy ūsynady.
Sarapşylardyŋ pıkırınşe, fabbing – sifrlyq qoǧamnyŋ jaŋa syn-qaterı. Jasöspırımderdıŋ şynaiy ömırge qyzyǧuşylyǧyn arttyru, olarmen senımdı qarym-qatynas ornatu jäne qoldau körsetu – būl ädettıŋ aldyn aludyŋ basty joly.
