Qarapaıym bir jalaý, eltańba nemese ánuran – bular tek resmı belgiler ǵana emes. Bul – halyqtyń júreginde saqtalǵan tarıh, urpaqtan-urpaqqa jalǵasqan mura. Qazaqstan Respýblıkasynyń rámizderi de dál solaı – táýelsizdigimizdiń sımvoly, ultymyzdyń aınasy.
Kók tý – kók aspandaǵy táýelsizdik jyry. Týdy kórgende eń aldymen kózge túsetini – onyń tunyq kók túsi. Bul tús – beıbitshilik pen turaqtylyqtyń belgisi, sonymen qatar qazaqtyń keń-baıtaq dalasyndaı sheksiz kók aspannyń kórinisi. Ortada altyn kún jarqyraıdy, onyń astynda qyran qalyqtap tur. Kún – ómir men molshylyqtyń belgisi, al qyran – erkindiktiń, táýelsizdiktiń sımvoly. Qansha daýyl soqsa da, qyran kók aspanda qanatyn keń jaıady, baǵytyn joǵaltpaıdy. Qazaq halqy da dál sol sekildi – taǵdyrdyń qandaı synaǵy bolsa da, eńsesin tiktep, alǵa qaraı umtylǵan. Al endi týymyzdyń sol jaq shetinde órnektelgen ulttyq oıý-órnekke qarańyzshy! Bul bizdiń mádenıetimizdiń aınasy emes pe? Babalarymyzdyń qoltańbasy, ulttyq rýhymyzdyń bedeli!
Eltańba – eldiktiń belgisi. Kez kelgen memlekettiń júregi – onyń eltańbasy. Al bizdiń Eltańbamyz erekshe! Ondaǵy sheksizdikti meńzeıtin sheńber – álemniń tutastyǵy men birlikti bildiredi. Qos pyraq – erkindikke degen umtylys pen qaısarlyqtyń belgisi. Qazaqtyń qanynda jylqyǵa degen súıispenshilik burynnan bar emes pe? Pyraq – arman, maqsat, bıikke samǵaý! Ortasyndaǵy shańyraq – birlik pen úıdiń sımvoly. Qazaq úshin shańyraq – qasıetti, ol bútin otbasynyń tiregi. Demek, Eltańba – eldiń tatýlyǵy men birliginiń aıǵaǵy.
Ánuran – rýhty kóterer ulttyq rýh. «Meniń Qazaqstanym» ánin estigende boıyńdy erekshe sezim bılemeı me? Bul án – júrektiń úni, eldiń daýysy. Ánuran árbir qazaqstandyqtyń boıyna maqtanysh pen jiger uıalatady. Ol bizge tek án emes, eldiktiń jyry, bolashaqqa degen senim.
Rámizderge qurmet – elge qurmet! Rámiz – tek resmı belgi emes, ol – árbir azamattyń júregindegi elge degen súıispenshilik. Olarǵa tek qaǵazdaǵy sýret dep qaraýǵa bolmaıdy. Bul – bizdiń ultymyzdyń maqtanyshy, rýhymyzdyń beınesi. Sondyqtan Qazaqstannyń árbir azamaty óz rámizderin qurmettep, onyń máni men mańyzyn túsinýi kerek. Sebebi rámizder – ulttyń aınasy!
Aıgúl Muratqyzy
