قاراپايىم ءبىر جالاۋ، ەلتاڭبا نەمەسە ءانۇران – بۇلار تەك رەسمي بەلگىلەر عانا ەمەس. بۇل – حالىقتىڭ جۇرەگىندە ساقتالعان تاريح، ۇرپاقتان-ۇرپاققا جالعاسقان مۇرا. قازاقستان رەسپۋبليكاسىنىڭ رامىزدەرى دە ءدال سولاي – تاۋەلسىزدىگىمىزدىڭ سيمۆولى، ۇلتىمىزدىڭ ايناسى.
كوك تۋ – كوك اسپانداعى تاۋەلسىزدىك جىرى. تۋدى كورگەندە ەڭ الدىمەن كوزگە تۇسەتىنى – ونىڭ تۇنىق كوك ءتۇسى. بۇل ءتۇس – بەيبىتشىلىك پەن تۇراقتىلىقتىڭ بەلگىسى، سونىمەن قاتار قازاقتىڭ كەڭ-بايتاق دالاسىنداي شەكسىز كوك اسپاننىڭ كورىنىسى. ورتادا التىن كۇن جارقىرايدى، ونىڭ استىندا قىران قالىقتاپ تۇر. كۇن – ءومىر مەن مولشىلىقتىڭ بەلگىسى، ال قىران – ەركىندىكتىڭ، تاۋەلسىزدىكتىڭ سيمۆولى. قانشا داۋىل سوقسا دا، قىران كوك اسپاندا قاناتىن كەڭ جايادى، باعىتىن جوعالتپايدى. قازاق حالقى دا ءدال سول سەكىلدى – تاعدىردىڭ قانداي سىناعى بولسا دا، ەڭسەسىن تىكتەپ، العا قاراي ۇمتىلعان. ال ەندى تۋىمىزدىڭ سول جاق شەتىندە ورنەكتەلگەن ۇلتتىق ويۋ-ورنەككە قاراڭىزشى! بۇل ءبىزدىڭ مادەنيەتىمىزدىڭ ايناسى ەمەس پە؟ بابالارىمىزدىڭ قولتاڭباسى، ۇلتتىق رۋحىمىزدىڭ بەدەلى!
ەلتاڭبا – ەلدىكتىڭ بەلگىسى. كەز كەلگەن مەملەكەتتىڭ جۇرەگى – ونىڭ ەلتاڭباسى. ال ءبىزدىڭ ەلتاڭبامىز ەرەكشە! ونداعى شەكسىزدىكتى مەڭزەيتىن شەڭبەر – الەمنىڭ تۇتاستىعى مەن بىرلىكتى بىلدىرەدى. قوس پىراق – ەركىندىككە دەگەن ۇمتىلىس پەن قايسارلىقتىڭ بەلگىسى. قازاقتىڭ قانىندا جىلقىعا دەگەن سۇيىسپەنشىلىك بۇرىننان بار ەمەس پە؟ پىراق – ارمان، ماقسات، بيىككە سامعاۋ! ورتاسىنداعى شاڭىراق – بىرلىك پەن ءۇيدىڭ سيمۆولى. قازاق ءۇشىن شاڭىراق – قاسيەتتى، ول ءبۇتىن وتباسىنىڭ تىرەگى. دەمەك، ەلتاڭبا – ەلدىڭ تاتۋلىعى مەن بىرلىگىنىڭ ايعاعى.
ءانۇران – رۋحتى كوتەرەر ۇلتتىق رۋح. «مەنىڭ قازاقستانىم» ءانىن ەستىگەندە بويىڭدى ەرەكشە سەزىم بيلەمەي مە؟ بۇل ءان – جۇرەكتىڭ ءۇنى، ەلدىڭ داۋىسى. ءانۇران ءاربىر قازاقستاندىقتىڭ بويىنا ماقتانىش پەن جىگەر ۇيالاتادى. ول بىزگە تەك ءان ەمەس، ەلدىكتىڭ جىرى، بولاشاققا دەگەن سەنىم.
رامىزدەرگە قۇرمەت – ەلگە قۇرمەت! ءرامىز – تەك رەسمي بەلگى ەمەس، ول – ءاربىر ازاماتتىڭ جۇرەگىندەگى ەلگە دەگەن سۇيىسپەنشىلىك. ولارعا تەك قاعازداعى سۋرەت دەپ قاراۋعا بولمايدى. بۇل – ءبىزدىڭ ۇلتىمىزدىڭ ماقتانىشى، رۋحىمىزدىڭ بەينەسى. سوندىقتان قازاقستاننىڭ ءاربىر ازاماتى ءوز رامىزدەرىن قۇرمەتتەپ، ونىڭ ءمانى مەن ماڭىزىن ءتۇسىنۋى كەرەك. سەبەبى رامىزدەر – ۇلتتىڭ ايناسى!
ايگۇل مۇراتقىزى
