Memlekettik kirister komıteti áleýmettik jelide taraǵan salyq tólemegen blogerlerdiń tizimine qatysty málimdeme jasady. Vedomstvo bul qujattyń resmı emes ekenin jáne onyń júrgizilip jatqan salyqtyq tekserýlerge qatysy joǵyn atap ótti, dep habarlaıdy "Adyrna" ulttyq portaly.
Komıtettiń habarlaýynsha, jelide taraǵan tizim memlekettik kirister organynyń salyqtyq baqylaý aktisi emes.
"Áleýmettik jelide taraǵan tizim salyqtyq baqylaý júrgizetin memlekettik kirister organynyń resmı qujaty bolyp sanalmaıdy", – delingen vedomstvonyń habarlamasynda.
Buǵan deıin ınternette salyqtan jaltarǵan qazaqstandyq blogerler men shoý-bıznes ókilderiniń tizimi taraǵan bolatyn.
2023 jyldyń 29 qazanyndaǵy resmı derekke sáıkes, elimizde tirkelgen 745 bloger 9 aı ishinde memleketke 1,2 mıllıard teńgeden astam salyq tólegen.
Salyq kodeksine sáıkes, Instagram, YouTube, TikTok jáne basqa da áleýmettik jelilerde 20 myńnan astam jazylýshysy bar tulǵalar resmı tabys taýyp, salyq tóleýi tıis. Olardyń jarnamadan jáne aqparattyq ónimderdi ilgeriletýden tapqan tabystaryna zań boıynsha salyq salynady.
