Ūlybritaniianyŋ jaŋa premer-ministrı qyzmetıne kırısken Endi Biornem 20 şıldede jurnalisterge bergen mälımdemesınde alǧaşqy telefon qoŋyraularyn Ukraina prezidentı Vladimir Zelenskiige jäne AQŞ prezidentı Donald Trampqa şalatynyn aitty. Būl turaly DW basylymy jazdy, dep habarlaidy "Adyrna".
Britan saiasatkerı Zelenskiige Londonnyŋ Ukrainaǧa körsetıp otyrǧan kömegınde «eşqandai özgerıs bolmaitynyn» jetkızetının jäne būrynǧy premer-ministr Kir Starmer siiaqty ukrain köşbasşysyn «100 paiyz qoldaitynyn» mälımdedı.
«Prezident Zelenskii Ūlybritaniianyŋ qoldauynyŋ berık ärı myzǧymas ekenıne eş kümändanbaidy. Būl qoldau ärı qarai da jalǧasady, men de jeke özım onyŋ janynda bolamyn», – dedı Biornem.
Germaniia kanslerı Fridrih Mers jaŋa premer-ministrdı qyzmetke kırısuımen qūttyqtap, jaqyn arada Germaniiaǧa keluge şaqyrdy.
Merstıŋ aituynşa, ol Biornemmen qazırgı halyqaralyq syn-qaterlerdı talqylauǧa müddelı. Kansler Ūlybritaniia men Germaniianyŋ jaqyn odaqtas ärı serıktes memleketter ekenın atap öttı.
«Däl osyndai kezeŋderde bızdıŋ tereŋ bailanysymyz aiqyn körınedı», – dedı Mers.
Europalyq keŋestıŋ töraǧasy Antoniu Koşta da Briussel men London arasyndaǧy qarym-qatynasty nyǧaitu jūmystary jalǧasady degen ümıt bıldırdı.
Onyŋ aituynşa, soŋǧy ekı jylda Euroodaq pen Ūlybritaniia arasyndaǧy bailanys jaŋa ärı oŋ serpın alǧan.
«Bızdıŋ azamattarymyz ben biznes üşın yntymaqtastyqty odan ärı tereŋdetudı asyǧa kütemın. Ūlybritaniia men Euroodaq bırge bolǧanda äldeqaida myqty», – dep jazdy Koşta X äleumettık jelısınde.
Būryn Manchester qalasynyŋ merı bolǧan Endi Biornem soŋǧy on jyl ışınde Ūlybritaniianyŋ jetınşı premer-ministrı atandy. Al Reseidıŋ Ukrainaǧa qarsy soǧysy bastalǧaly berı būl qyzmetke kelgen besınşı premer bolyp otyr.
17 şıldede Biornem resmi türde Leiboristık partiianyŋ jaŋa köşbasşysy bolyp jariialandy.
Saiasatker partiianyŋ qalypty solşyl qanatynyŋ basty ümıtı sanalady jäne ūlttyq ärı öŋırlık deŋgeide mol saiasi täjıribege ie. Ol alǧaş ret 2001 jyly Qauymdar palatasyna sailanǧan. Keiın Toni Bler men Gordon Braun ükımetterınde bırqatar joǧary lauazymdardy atqardy. Atap aitqanda, Qazynaşylyqtyŋ bas hatşysy, mädeniet ministrı jäne densaulyq saqtau ministrı qyzmetterın atqarǧan.
Bukingem saraiy korol III Karl men jaŋa premer-ministrdıŋ qol alysyp tūrǧan fotosuretın jariialady.
Biornem Leiboristık partiia köşbasşylyǧyna jalǧyz ümıtker boldy. Ony Qauymdar palatasyndaǧy 403 leiborist deputattyŋ 379-y qoldady.
Eks-mer halyqtyŋ ömır süru deŋgeiın jaqsartuǧa uäde berıp otyr. Sarapşylardyŋ pıkırınşe, jaqyn uaqytta ol ministrler kabinetınde kadrlyq özgerıster jasauy mümkın.
Manchesterdı toǧyz jyl basqarǧan kezeŋde Biornem «Soltüstıktıŋ korolı» degen beiresmi laqap atqa ie boldy. Onyŋ basşylyǧymen öŋır ekonomikasy eldegı ortaşa körsetkışten jyldam ösıp, qalalyq audandardaǧy kedeilık deŋgeiı tömendegen.
Leiboristık partiia Biornem oŋşyl populist saiasatker Naidjel Faradjdyŋ jäne onyŋ Reform UK partiiasynyŋ tanymaldyǧynyŋ artuyn tejeuge yqpal etedı dep ümıttenedı.
Būǧan deiın The Times gazetıne jariialanǧan maqalasynda Biornem Ūlybritaniianyŋ älemdık arenadaǧy jetekşı rölın saqtauǧa jäne qazırgı odaqtastyqtardy nyǧaituǧa beiıldı ekenın aitqan.
Al būrynǧy premer-ministr Kir Starmer qyzmetke kelgennen keiın ekı jyl ötken soŋ saiasi sätsızdıkter men partiiaışılık qysymnyŋ küşeiuıne bailanysty 22 mausymda otstavkaǧa ketetının mälımdegen bolatyn.
