Búgin Qazaqstan Prezıdenti Qasym-Jomart Toqaev Grýzııa Premer-mınıstri Iraklıı Kobahıdzemen resmı kelissóz júrgizdi. Kezdesý barysynda eki el arasyndaǵy yntymaqtastyqtyń ózekti máseleleri talqylandy, dep habarlaıdy “Adyrna” ulttyq portaly.
Memleket basshysy Iraklıı Kobahıdzeni Premer-mınıstr qyzmetine qaıta taǵaıyndalýymen quttyqtap, oǵan jańa qyzmetinde sáttilik tiledi. Prezıdent sońǵy jyldary Grýzııanyń ekonomıkalyq ósimi aıtarlyqtaı joǵarylap, 9,4 paıyzǵa jetkenin atap ótti.
Qasym-Jomart Toqaev qazaq-grýzın qarym-qatynastarynyń qarqyndy damyp kele jatqanyn joǵary baǵalap, Grýzııany Qazaqstannyń Kavkazdaǵy senimdi seriktesi retinde atady. Onyń aıtýynsha, eki eldi ózara dostyq pen tarıhı baılanystar biriktiredi.
Óz kezeginde Iraklıı Kobahıdze Qazaqstanǵa kelgenine qýanyshty ekenin jetkizip, qyzmetke kiriskennen keıingi alǵashqy sheteldik saparlarynyń birin Astanaǵa arnaǵanyn atap ótti. Sondaı-aq, ol Qazaqstan tarapyna qonaqjaılyq kórsetkeni úshin rızashylyǵyn bildirdi.
Kezdesý aıasynda taraptar ekonomıkalyq, saýda jáne mádenı-gýmanıtarlyq salalardaǵy áriptestikti odan ári nyǵaıtý máselelerin talqylady.
