Memleket basşysy Qasym-Jomart Toqaev "Qazaqstan Respublikasynyŋ keibır zaŋnamalyq aktılerıne dene şynyqtyru jäne sport, sondai-aq artyq zaŋnamalyq reglamentteudı bolǧyzbau mäselelerı boiynşa özgerıster men tolyqtyrular engızu turaly" Qazaqstan Respublikasynyŋ Zaŋyna qol qoidy. Būl turaly Aqorda jazdy, dep habarlaidy “Adyrna” ūlttyq portaly.
Zaŋ memlekettıŋ dene şynyqtyru jäne sport salasyn damytu saiasatyn jetıldıruge baǧyttalǧan.
Uäkılettı organ basym sport türlerınıŋ respublikalyq jäne öŋırlık tızbesın äzırleidı, joǧarǧy jetıstıkter sporty türlerınıŋ tızımın jäne olardy biudjet esebınen qarjylandyru tärtıbın aiqyndaidy.
Basym sport türlerı halyqaralyq arenada qol jetkızgen nätijelerge qarai bekıtıledı. Būl – Olimpiada, Paralimpiada, Surdlimpiada, Aziia, Paraziia oiyndarynyŋ baǧdarlamasyna engen sport türlerı, sondai-aq ūlttyq sport türlerı.
Sport federasiialaryn akkreditteuge qatysty erejeler jetıldırıldı. Endı olar ūlttyq jäne jergılıktı sport federasiialary bolyp bölınedı.
Şeteldık legionerlerdı biudjetten jäne kvazimemlekettık sektor subektılerınıŋ qarajaty esebınen qarjylandyruǧa tyiym salynady. Būdan bylai biudjet qarajaty tek tört baǧytqa: joǧary jetıstıkter sportyna, onyŋ ışınde sporttyŋ basym türlerıne, memlekettık dene şynyqtyru-sport ūiymdarynyŋ qyzmetıne, būqaralyq sportqa, sporttyq infraqūrylymdy damytuǧa jūmsalady.
Zaŋǧa "sporttyq daiarlyqtyŋ ūlttyq standarttary" ūǧymy engızıledı. Soǧan säikes sportşylardy töl tanym-tüsınıgımızge sai tärbielep, olardyŋ boiyna dästürlı qūndylyqtardy sıŋırudı közdeitın bıryŋǧai daiarlau standarty äzırlenedı.
Uäkılettı organǧa dopingke qarsy erejelerdı būzǧany üşın şara qabyldau ökılettılıgı berıledı.
