Memleket basshysy Qasym-Jomart Toqaev qazaqstandyqtardy Alǵys aıtý kúnimen quttyqtady, dep habarlaıdy «Adyrna» tilshisi.
Prezıdenttiń aıtýynsha, bul mereke bereke-birligimizdi bekemdeı túsedi.
«Osy kúni elimizdiń azamattary bir-birine erekshe iltıpat kórsetip, rızashylyǵyn bildiredi. Sondaı-aq tatýlyq, yntymaq, dostyq syndy qasterli qundylyqtar jan-jaqty dáripteledi. Munyń bári ultty uıystyrýdyń utymdy joly ekeni sózsiz.
Halqymyzdyń ýaqyt synynan ótken janashyrlyq, qamqorlyq, meıirimdilik sııaqty asyl qasıetteri, ásirese qıyn-qystaý kezderde aıqyn kórindi. Búginde memleketimizde aýqymdy ózgerister bolyp, Ádiletti Qazaqstandy qurý jolynda naqty qadamdar jasalyp jatyr. Osyndaı syndarly sátte eldik múddeni bárinen bıik qoıyp, yrys-yntymaǵymyzdy saqtaý óte mańyzdy»,—dedi ol.
Qasym-Jomart Toqaev el bolashaǵyna senetinin atap ótti.
«Biz ozyq oıly ult retinde kózdegen barlyq bıik maqsattarǵa qol jetkizetinimizge kámil senemin. Osy oraıda tynymsyz ter tógip, Qazaqstandy kórkeıtýge óz úlesin qosyp júrgen azamattarǵa alǵys aıtamyn. Barshańyzǵa baq-bereke jáne mol ıgilik tileımin! Elimiz aman, jurtymyz tynysh bolsyn!»,—dep túıindedi ol.
Alǵys aıtý kúni 2017 jyly sol kezdegi Prezıdent Nursultan Nazarbaevtyń jarlyǵymen bekitildi. Bul mereke mynandaı oqıǵalarǵa negizdeldi. 1995 jyldyń 1 naýryzynda Qazaqstan halqy Assambleıasy quryldy. Al 2015 jyly Assambleıanyń 20 jyldyǵynda Prezıdent Nazarbaev bul kúndi kóptegen halyqtar elge kúshtep qonystandyrylǵan kezde tózimdilik pen qonaqjaılylyq tanytqany úshin qazaqtarǵa alǵys bildire alatyn kúni dep jarııalaýdy usynǵan.
