Memleket basşysy Qasym-Jomart Toqaev qazaqstandyqtardy Alǧys aitu künımen qūttyqtady, dep habarlaidy «Adyrna» tılşısı.
Prezidenttıŋ aituynşa, būl mereke bereke-bırlıgımızdı bekemdei tüsedı.
«Osy künı elımızdıŋ azamattary bır-bırıne erekşe ıltipat körsetıp, rizaşylyǧyn bıldıredı. Sondai-aq tatulyq, yntymaq, dostyq syndy qasterlı qūndylyqtar jan-jaqty därıpteledı. Mūnyŋ bärı ūltty ūiystyrudyŋ ūtymdy joly ekenı sözsız.
Halqymyzdyŋ uaqyt synynan ötken janaşyrlyq, qamqorlyq, meiırımdılık siiaqty asyl qasietterı, äsırese qiyn-qystau kezderde aiqyn körındı. Bügınde memleketımızde auqymdy özgerıster bolyp, Ädılettı Qazaqstandy qūru jolynda naqty qadamdar jasalyp jatyr. Osyndai syndarly sätte eldık müddenı bärınen biık qoiyp, yrys-yntymaǧymyzdy saqtau öte maŋyzdy»,—dedı ol.
Qasym-Jomart Toqaev el bolaşaǧyna senetının atap öttı.
«Bız ozyq oily ūlt retınde közdegen barlyq biık maqsattarǧa qol jetkızetınımızge kämıl senemın. Osy oraida tynymsyz ter tögıp, Qazaqstandy körkeituge öz ülesın qosyp jürgen azamattarǧa alǧys aitamyn. Barşaŋyzǧa baq-bereke jäne mol igılık tıleimın! Elımız aman, jūrtymyz tynyş bolsyn!»,—dep tüiındedı ol.
Alǧys aitu künı 2017 jyly sol kezdegı Prezident Nūrsūltan Nazarbaevtyŋ jarlyǧymen bekıtıldı. Būl mereke mynandai oqiǧalarǧa negızdeldı. 1995 jyldyŋ 1 nauryzynda Qazaqstan halqy Assambleiasy qūryldy. Al 2015 jyly Assambleianyŋ 20 jyldyǧynda Prezident Nazarbaev būl kündı köptegen halyqtar elge küştep qonystandyrylǧan kezde tözımdılık pen qonaqjailylyq tanytqany üşın qazaqtarǧa alǧys bıldıre alatyn künı dep jariialaudy ūsynǧan.
