Aqtau qalasynyŋ prokurory, aǧa ädılet keŋesşısı Erbolat Äbdırov Almaty äuejaiynda ūstaldy degen aqparat tarady. Būl turaly «İnformator KZ» jäne Yedilov Online Telegram-arnalary jazdy, dep habarlaidy «Adyrna» tılşısı.
48 jastaǧy prokuror äuejaida janjal şyǧarǧan.
«Äbdırov eŋbek demalysynda Astanadan Almatyǧa ūşyp kelgen. Almatyǧa qonǧannan keiın ony polisiianyŋ jelılık bölımı qyzmetkerlerı ūstaǧan. Onyŋ üstınen QR ÄQBtK-nıŋ 440-baby 1-bölıgı boiynşa (Qoǧamdyq oryndarda alkogoldık ışımdıkter ışu nemese mas küiınde paida bolu) jäne 434-baby 1-bölıgı boiynşa (Qoǧamdyq oryndarda bylapyt söileu, azamattarǧa tıl tigızıp, tiısu) hattama toltyryldy»,—delıngen habarlamada.
Maŋǧystau oblystyq prokuraturasy būl jaǧdaiǧa tüsınıkteme berdı.
«Atalǧan faktıge bailanysty qyzmettık tekserıs jürgızılude, onyŋ qorytyndysy boiynşa qyzmetkerge qatysty tiıstı şaralar qoldanylady», –dedı qūzyrly organ.
Aita keteiık, Äbdırov Astana, Maŋǧystau, Batys Qazaqstan jäne Qaraǧandy oblystarynyŋ prokuraturasynda, Bas prokuratura men Bas kölık prokuraturasynda jūmys ıstegen.
