Túrkııadaǵy demalys aımaǵynda qaıǵyly oqıǵa bolǵan. Olardyń qatarynda Turkish Airlines áýe kompanııasynyń satý bóliminde qyzmet atqarǵan Zehra Gıýltekın, onyń kúıeýi, tórt balasy jáne basqa da týystary bolǵany anyqtalǵan, dep habarlaıdy “Adyrna” ulttyq portaly rg.ru-ǵa siltep.
Sársenbi kúni marqumdardy jerleý rásimine Túrkııa prezıdenti Rejep Taıyp Erdoǵan qatysty. Ol qaıǵyǵa batqan halyqtyń aldynda kóz jasyna erik berdi.
“Biz jaraly boldyq. Júregimiz otqa orandy. Qaıtys bolǵandardyń týystary men halqymyzǵa sabyr tileımin”, - dedi prezıdent.
Marqumdardyń týysy Ózgúr Túrkmenniń aıtýynsha, otqa oranǵan qonaqúıde qalǵan aǵaıyndy baýyrlar men ápke-qaryndastar kómek surap habarlasqan.
“Bizdi qutqaryńdar! Ata-anamyzǵa jete almaı jatyrmyz. Munda órt sóndirýshiler joq,” – dep jantúrshigerlik habarlama jazǵan.
Alaıda birneshe saǵat ótken soń olardyń barlyǵy, ata-analary men týystarymen birge, qonaqúıden óli tabylǵan.
Qaıǵyly oqıǵa Túrkııanyń Stambýl qalasynan 270 shaqyrym qashyqtyqta ornalasqan Grand Kartal taý shańǵysy kýrortyndaǵy 12 qabatty qonaqúıde oryn aldy. Órt kezinde qonaqúıde qysqy demalysqa kelgen týrıster men jumysshylar bolǵan. Órttiń tez taralýy qalyń tútin men qaýipsizdik júıesiniń jetkiliksizdiginen adamdardyń qashýyna múmkindik bermegen.
Keıbir tiri qalǵandar qonaqúıde órt dabylynyń estilmegenin jáne órtke qarsy baspaldaqtardyń tabylmaǵanyn aıtady. Túrkııa ınjenerleriniń kásipodaǵy qonaqúıdiń ishindegi sýretterden órtke qarsy júıeniń ornatylmaǵanyn, onyń kóp jyldar buryn ornatylýy tıis bolǵanyn málimdedi.
Eske sala keteıik, Túrkııadaǵy qonaq úı órtinen 76 adam qaza tapqan. Elde jalpyulttyq aza tutý kúni jarııalandy.
