Memleket basshysy Qasym-Jomart Toqaev Túrkııa Prezıdenti Rejep Taııp Erdoǵanmen kezdesti. Bul týraly Aqorda málimdedi, dep habarlaıdy ”Adyrna” ulttyq portaly.
Qasym-Jomart Toqaev Ankaraǵa jumys sapary barysynda Túrkııa Prezıdenti Rejep Taııp Erdoǵanmen kezdesý ótkizdi. Memleket basshysy qonaqjaılyq kórsetip, qurmetpen qarsy alǵany úshin Rejep Taııp Erdoǵanǵa rızashylyǵyn bildirdi.
Memleket basshysy, eń aldymen, joıqyn jer silkinisinen zardap shekken Túrkııa halqyna kóńil aıtty.
«Marqumdardyń týǵan-týystaryna, Ózińizge jáne búkil Túrkııa halqyna taǵy da kóńil aıtamyn. Túrkııa – árqashan qıyndyqqa qarsy tura bilgen memleket. Sizder mol tájirıbe men el birliginiń arqasynda bul qıyndyqty eńserip shyǵasyzdar dep senemin», – dedi Qasym-Jomart Toqaev.
Prezıdent qaýip-qaterge qashan da daıyn bolý kerek ekenin atap ótip, tótenshe jaǵdaılar salasyndaǵy yntymaqtastyqty damytýdyń mańyzdylyǵyna toqtaldy. Osy oraıda «Apat jáne tótenshe jaǵdaılar menedjmenti, gýmanıtarlyq kómek» taqyrybynda ótip jatqan sammıtti óte qajetti is-shara dep esepteıtinin jetkizdi.
«Tabıǵı apat kezinde memleketterdiń bir-birine kómek kórsetýi asa mańyzdy. Buǵan osy joly taǵy da kózimiz jetti. Baýyrlas el qıyndyqqa tap bolǵanda túrki jurty aýyzbirshilik pen janashyrlyqtyń ozyq úlgisin kórsetti. Qazaqstan da túrik baýyrlarǵa birden qol ushyn sozdy», – dedi Memleket basshysy.
Sonymen qatar Prezıdent Túrkııa Qazaqstannyń basty saýda seriktesteriniń biri ekenin aıtty.
«Túrkııa Qazaqstannyń basty bes saýda seriktesiniń qataryna kiredi. Byltyr eki el arasyndaǵy saýda aınalymy 33 paıyzǵa ósip, 6,3 mıllıard dollarǵa jetti. Bul – júıeli jumystyń nátıjesi. Qazaqstannyń taýarlaryn Túrkııa naryǵyna kóptep shyǵarýǵa múmkindik bar», - dedi Memleket basshysy.
Qasym-Jomart Toqaev túrik ınvestorlarynyń Qazaqstandaǵy jobalaryn qoldaýǵa daıyn ekenin jetkizdi. Sondaı-aq kezdesý barysynda «Orta dáliz» dep atalatyn Transkaspıı halyqaralyq kólik baǵyty asa mańyzdy ról atqaratyny sóz boldy. Qazaqstan tarapy áleýeti mol osy kólik-logıstıkalyq baǵdardy damytý úshin ortaq ınfraqurylymdyq jobalardy júzege asyrýǵa daıyn ekenin málimdedi.
Óz kezeginde Rejep Taııp Erdoǵan shaqyrýyn qabyl alyp, Ankaraǵa kelgeni úshin Qasym-Jomart Toqaevqa alǵys aıtty.
«Túrkııaǵa kelgenińizge qýanyshtymyn. Alapat jer silkinisinen 49 myń adam qaza tapty. Osyndaı qıyn sátte alǵashqy bolyp telefon shalǵan álemdik kóshbasshylardyń biri ózińiz boldyńyz. Qazaqstannyń qutqarýshylary zardap shekken azamattarymyzdy qutqarýǵa atsalysty. Biz shynaıy baýyrmaldyqty sezindik», – dedi Túrkııa Prezıdenti.
