Qazaqstan úkimeti alty aı merzimge kartop eksportyna tyıym salý týraly sheshim qabyldady, dep habarlaıdy "Adyrna" ulttyq portaly premer-mınıstrdiń baspasóz qyzmetine silteme jasap.
Tyıym tek Eýrazııalyq ekonomıkalyq odaq elderine jasalady. Buǵan kartopqa suranystyń kúrt ósýi sebep bolǵan.
«Kórshiles elderden, ásirese Ózbekstannan suranystyń artýyna jáne bıylǵy jyly eksporttyq baǵalardyń joǵary bolýyna baılanysty kartop eksporty 411 myń tonnadan 605 myń tonnaǵa deıin artty. Bul suranys ishki naryqqa áser etti. Sońǵy aptada eksportqa baǵyttalǵan óndirýshilerdiń baǵasy 170 teńgeden 270 teńgege deıin kúrt ósti», – delingen habarlamada.
Úkimettiń málimetinshe, 16 qańtardan bastap eksportqa fıtosanıtarlyq sertıfıkattar berý tolyqtaı toqtatyldy.
«Qabyldanǵan sharalar kartop baǵasynyń turaqtylyǵyn qamtamasyz etýge, baǵanyń negizsiz ósýine jol bermeýge jáne alypsatarlyq áreketterin boldyrmaýǵa baǵyttalǵan», – dep atap ótti úkimet.
Úkimettiń málimetinshe, qazirgi ýaqytta qolda bar kartop qory 2025 jyldyń erte jınalatyn ónimine deıin ishki qajettilikti tolyq qamtamasyz etýge jetkilikti.
