Búgin – áıgili ánshi, akter, rejısser, pedagog, ulttyq kásibı teatr óneriniń negizin salýshylardyń biri, Qazaqstannyń Halyq ártisi Qurmanbek Jandarbekovtyń týǵanyna 120 jyl toldy.
Dara talantymen dúıim jurtty tánti etken Qurmanbek Jandarbekovtyń boıyndaǵy tabıǵı daryn, ánshilik qabilet teatr sahnasynda kesek obrazdar galereıasyn jasaýǵa múmkindik berdi.
Teatr sahnasyndaǵy alǵashqy qadamy Muhtar Áýezovtiń «Qaragóz» tragedııasyndaǵy Syrym, «Eńlik-Kebekte» Kebek rólderinen bastaldy.
Qurmanbek Jandarbekov - qazaq operasynyń damýyna da eleýli úles qosqan azamattardyń biri. Úzdik operalyq partııalarynyń biri «Qyz Jibek» operasyndaǵy Bekejan róli.
Qurmanbek Jandarbekov 1905 jyly Shymkent ýeziniń Aqsý aýylynda dúnıege kelgen. Ákesi Jandarbek ánge de, aıtysqa da usta, segiz qyrly bir syrly kisi bolsa kerek. Alǵan jary Shımene ári ánshi, ári aqyn desedi. Án men kúı, jyr-dýmannan arylmaıtyn otbasynda tárbıelengen bala Qurmash bes jasynan óleń aıtyp, dombyra tartady.
1916 jyly ákesi Jandarbekti patshanyń jarlyǵymen áskerge alǵanda nemere inisi Ábdikárim Qurmanbek pen jeńgesi Shımenege qamqor bolady. Qurekeń aǵasynyń seriligi men tapqyr da ótkirligine tánti bolyp eliktep ósedi.
Jıyrmasynshy jyldary Táshkent qalasynda halyq aǵartý ınstıtýtynda oqı júrip, Qurmanbek kórkemónerpazdardyń drama úıirmesine úzbeı qatysady.
Qurmanbek Jandarbekov Tashkent pedagogıkalyq ýchılıesin, Máskeýdegi Búkilodaqtyq kınematografııa ınstıtýtynyń akterlik bólimin jáne Memlekettik teatr óneri ınstıtýtyn bitirgen.
Abaı atyndaǵy Qazaq memlekettik akademııalyq opera jáne balet teatrynyń, M.Áýezov atyndaǵy Qazaq memlekettik akademııalyq drama teatrynyń bas rejısseri, Qurmanǵazy atyndaǵy Qazaq ulttyq konservatorııasynyń oqytýshysy qyzmetterin atqarǵan.
Sonymen qatar, ol Tarǵyn («Er Tarǵyn»), Jalbyr («Jalbyr») partııalaryn oryndap, ánshilik sheberligin tanytty. Rejısser retinde E.Brýsılovskııdiń «Er Tarǵyn», «Jalbyr», «Gvardııa, alǵa», A.Jubanov pen L.Hamıdıdiń «Abaı», M.Tólebaevtyń «Birjan-Sara» operalaryn qoıdy. Kınoǵa túsip, Jaqas («Amangeldi»), Qadyrbaı («Jambyl»), Sadyq («Biz Jetisýdanbyz») beınelerin somdady.
Jıyrmasynshy jyldarda Tashkent qalasynda ótken bir konertte qazaqtyń jetpisten astam ánin shyrqaǵan.
Lenın, Eńbek Qyzyl Tý, «Qurmet belgisi» ordenderimen marapattalǵan. Almaty qalasynda bir kóshege aty berilip, ómiriniń sońǵy jyldarynda turǵan úıine eskertkish taqta ornatylǵan.
