Bügın – äigılı änşı, akter, rejisser, pedagog, ūlttyq käsıbi teatr önerınıŋ negızın saluşylardyŋ bırı, Qazaqstannyŋ Halyq ärtısı Qūrmanbek Jandarbekovtyŋ tuǧanyna 120 jyl toldy.
Dara talantymen düiım jūrtty täntı etken Qūrmanbek Jandarbekovtyŋ boiyndaǧy tabiǧi daryn, änşılık qabılet teatr sahnasynda kesek obrazdar galereiasyn jasauǧa mümkındık berdı.
Teatr sahnasyndaǧy alǧaşqy qadamy Mūhtar Äuezovtıŋ «Qaragöz» tragediiasyndaǧy Syrym, «Eŋlık-Kebekte» Kebek rölderınen bastaldy.
Qūrmanbek Jandarbekov - qazaq operasynyŋ damuyna da eleulı üles qosqan azamattardyŋ bırı. Üzdık operalyq partiialarynyŋ bırı «Qyz Jıbek» operasyndaǧy Bekejan rölı.
Qūrmanbek Jandarbekov 1905 jyly Şymkent uezınıŋ Aqsu auylynda düniege kelgen. Äkesı Jandarbek änge de, aitysqa da ūsta, segız qyrly bır syrly kısı bolsa kerek. Alǧan jary Şimene ärı änşı, ärı aqyn desedı. Än men küi, jyr-dumannan arylmaityn otbasynda tärbielengen bala Qūrmaş bes jasynan öleŋ aityp, dombyra tartady.
1916 jyly äkesı Jandarbektı patşanyŋ jarlyǧymen äskerge alǧanda nemere ınısı Äbdıkärım Qūrmanbek pen jeŋgesı Şimenege qamqor bolady. Qūrekeŋ aǧasynyŋ serılıgı men tapqyr da ötkırlıgıne täntı bolyp elıktep ösedı.
Jiyrmasynşy jyldary Täşkent qalasynda halyq aǧartu institutynda oqi jürıp, Qūrmanbek körkemönerpazdardyŋ drama üiırmesıne üzbei qatysady.
Qūrmanbek Jandarbekov Taşkent pedagogikalyq uchilişesın, Mäskeudegı Bükılodaqtyq kinematografiia institutynyŋ akterlık bölımın jäne Memlekettık teatr önerı institutyn bıtırgen.
Abai atyndaǧy Qazaq memlekettık akademiialyq opera jäne balet teatrynyŋ, M.Äuezov atyndaǧy Qazaq memlekettık akademiialyq drama teatrynyŋ bas rejisserı, Qūrmanǧazy atyndaǧy Qazaq ūlttyq konservatoriiasynyŋ oqytuşysy qyzmetterın atqarǧan.
Sonymen qatar, ol Tarǧyn («Er Tarǧyn»), Jalbyr («Jalbyr») partiialaryn oryndap, änşılık şeberlıgın tanytty. Rejisser retınde E.Brusilovskiidıŋ «Er Tarǧyn», «Jalbyr», «Gvardiia, alǧa», A.Jūbanov pen L.Hamididıŋ «Abai», M.Tölebaevtyŋ «Bırjan-Sara» operalaryn qoidy. Kinoǧa tüsıp, Jaqas («Amangeldı»), Qadyrbai («Jambyl»), Sadyq («Bız Jetısudanbyz») beinelerın somdady.
Jiyrmasynşy jyldarda Taşkent qalasynda ötken bır konsertte qazaqtyŋ jetpısten astam änın şyrqaǧan.
Lenin, Eŋbek Qyzyl Tu, «Qūrmet belgısı» ordenderımen marapattalǧan. Almaty qalasynda bır köşege aty berılıp, ömırınıŋ soŋǧy jyldarynda tūrǧan üiıne eskertkış taqta ornatylǧan.
