Telejurnalist Qymbat Dosjan Jänıbektı şetel azamatyna satuǧa atsalysqan adamdardyŋ anyqtalyp jatqanyn mälımdedı, dep habarlaidy “Adyrna” ūlttyq portaly.
Ol özınıŋ jelıdegı paraqşasynda ızdeudıŋ qalai jüzege asyp jatqanyn aitty.
“2025 jyldyŋ alǧaşqy künı bügın... Jänıbek jaŋa jyl merekesımen qūttyqtady. «Qazaqstanǧa taǧy da menı aldyrtyŋyz, bilet alyp berıŋızşı, jaŋa jyldy sızdermen qarsy alǧym keledı» dep aĭtqan ötınışıŋdı oryndaĭ almadym. Uaqyt tyǧyz boldy, ekınşıden, senı şaqyrǧanymmen quantatyndaĭ jaŋalyǧym joq, äzırge... 2024 jyldyŋ 9 jeltoqsanynda QR Memlekettık keŋesşısı men QR Bas prokurory atyna resmi hat joldadym. Hatta Jänıbek Jūmaǧūlovty asyrap alǧan belgiialyq jalǧyzbasty äĭel — Valeri Savelevanyŋ bala asyrap aluǧa Arqalyqqa kelgende *** degen audarmaşyǧa 12 myŋ AQŞ dollaryn bergenı turaly jäne aqşany alǧan adamnyŋ aty-jönı aşyq jazyldy. 2024 jyldyn köktemınde osy mälımettı rastap, Valeri Saveleva asyrap alǧan ūly Jänıbekke bergen videosūhbatynda öz auzymen sol oqiǧany taǧy aitty. Valeri Saveleva Belgiiadan Arqalyqqa kelgende, Astana äuejaiynan kölıkpen ekı adamnyŋ kütıp alǧanyn, Arqalyqqa sol kölıkpen jetıp, audarmaşy äieldıŋ üiıne qonǧanyn, taŋerteŋ 12 myŋ dollardy sanap qolyna berıp, Balalar üiıne ekeuı bırge barǧanyn aşyq aitty. Balalar üiıne barǧanda aqşa alǧan äiel: «...bırden Jänıbektı taŋdamai, oilanǧan keiıp tanytyp, basqa balalarǧa da qarap, ötırık ıstep tūrynyz...» dep üiretken. V.Saveleva onyŋ aitqanyn būljytpai oryndapty. Būl sūhbattyŋ tüpnūsqasy Jänıbek Jūmaǧūlovta jene Jänıbektıŋ zaŋdy ökılı men — Qymbat Dosjanda”, - delıngen jazbada.
Odan bölek, halyq Belgiiadan kelgen tuǧan anasyn ızdep, Qazaqstanǧa kelgen Jänıbektıŋ tuystary turaly da sūrap jatyr.
“… janaşyr halyqqa aitarym, qatelespesem, sol jyldary bosanǧan äieldın 54-nen DNK material alyndy. Jänıbektıkımen eşqandai äieldıkı säikes kelmeidı. «Qalgan äielder qaida, olar nege tapsyrmaidy?» degen saual da oryndy. Oǧan keler bolsaq, «Ol äielderdı tabu qiynǧa soǧyp tūr, şetelge keşıp ketıptı, bızde tergeuşı jetıspeidı..» degen syŋdy türlı syltau estimın polisiiadan. Boljamdy äkesı tabyldy dedım, ol ras. Bıraq ol kısınıŋ özı būl ömırde joq, tuǧan balalary DNK analiz tapsyrudan bas tartty, bıraq, sol qaitys bolǧan kısınıŋ tuǧan bauyrlary bar, olar da bärın bılıp otyr. Men tıptı polisiia qyzmetkerımen arnaiy baryp jolyqtym, aiǧaiǧa basyp, ötınışımdı tyŋdamady. Kezınde osy balalardy şetel azamattaryna ūsynyp, dollardy sanap alǧandardyŋ qazır ūiqysy tynyş emestıgıne senımdımın. Būl oqiǧada audarmaşy jalǧyz figurant emes. Tergep-tekseru jūmysy dūrys, ädıl jürse, Astanadan jeke kölıken Arqalyqqa jetkızgenderden bastap, resmi lauazym atqarǧandardyŋ barlyǧy jauap beruı tiıs. Mıne, bır jyl öttı, Jänıbek ekeuımız osyndai nätije kütıp jürmız. Osy bır jyl ışınde qanşama äieldın taǧdyrymen tanystym. Bırınıŋ de atyn atap nemese foto-videosyn jariialap jıbergen joqpyn. Öitkenı Qazaq mediasyna 40 jyl qyzmet etıp kele jatqan men - jauapkerşılık degennıŋ ne ekenın bılemın. Däl solai, Valeri aitqan audarmaşy kım, ol qazır qaida tūrady, būryn qaida jūmys ıstedı, qazır qaida jūmys ıstep, qandai qyzmet atkaratynyna deiın bılemın, Jänıbek te bıledı”, — dedı Qymbat Dosjan.
Ol anyqtalǧan aqparatty jariialamau sebebın de tüsındırdı.
“Osy eldıŋ zaŋyna baǧynatyn azamat jäne Jänıbektıŋ resmi ökılı bolǧandyqtan, en bastysy, tergeu ısıne kedergı keltırmeiın dep äleumettık jelıge jariialamai otyrmyn. Haip quǧan bıreu bolsam, jaiyp salyp qarap otyrmaimyn ba? Bala saudasyna qatysy barlarǧa aitarym, Jänıbektıŋ şyndyǧyn aşyŋyzdar, maǧan habarlasyŋyzdar. Bızdıŋ qazırgı basty maqsat — balanyŋ tugan şeşesın tabu. Al bala saudasyna qatysty mäselemen tiıstı organdar ainalyssyn. Jiyrma jyl tūrmaq, elu jyl ötse de, bala saudasynyŋ jügı jeŋıldemeidı-ay. Qazır Jänıbek İspaniiada, qolyna tüsken jūmyska jegılıp, türlı salada qyzmet etıp jür. Tua sala tuǧan anasynan, tuǧan jerınen jyraq ketken ol qiyndyqqa äbden şyŋdalǧan, immunitetı myqty, bıraq jadaiy onşa emes. Külse de, älemnıŋ eŋ körıktı jerıne saiahattasa da «Menıŋ şeşem kım?» degen sūraqpen ömır sürıp keledı. Balanyŋ keşı solai batady, taŋy solai atady”, - dedı jurnalist.
Ūqsas jaŋalyqtar
