Telejýrnalıst Qymbat Dosjan Jánibekti shetel azamatyna satýǵa atsalysqan adamdardyń anyqtalyp jatqanyn málimdedi, dep habarlaıdy “Adyrna” ulttyq portaly.
Ol óziniń jelidegi paraqshasynda izdeýdiń qalaı júzege asyp jatqanyn aıtty.
“2025 jyldyń alǵashqy kúni búgin... Jánibek jańa jyl merekesimen quttyqtady. «Qazaqstanǵa taǵy da meni aldyrtyńyz, bılet alyp berińizshi, jańa jyldy sizdermen qarsy alǵym keledi» dep aı̆tqan ótinishińdi oryndaı̆ almadym. Ýaqyt tyǵyz boldy, ekinshiden, seni shaqyrǵanymmen qýantatyndaı̆ jańalyǵym joq, ázirge... 2024 jyldyń 9 jeltoqsanynda QR Memlekettik keńesshisi men QR Bas prokýrory atyna resmı hat joldadym. Hatta Jánibek Jumaǵulovty asyrap alǵan belgııalyq jalǵyzbasty áı̆el — Valerı Savelevanyń bala asyrap alýǵa Arqalyqqa kelgende *** degen aýdarmashyǵa 12 myń AQSh dollaryn bergeni týraly jáne aqshany alǵan adamnyń aty-jóni ashyq jazyldy. 2024 jyldyn kókteminde osy málimetti rastap, Valerı Saveleva asyrap alǵan uly Jánibekke bergen vıdeosuhbatynda óz aýzymen sol oqıǵany taǵy aıtty. Valerı Saveleva Belgııadan Arqalyqqa kelgende, Astana áýejaıynan kólikpen eki adamnyń kútip alǵanyn, Arqalyqqa sol kólikpen jetip, aýdarmashy áıeldiń úıine qonǵanyn, tańerteń 12 myń dollardy sanap qolyna berip, Balalar úıine ekeýi birge barǵanyn ashyq aıtty. Balalar úıine barǵanda aqsha alǵan áıel: «...birden Jánibekti tańdamaı, oılanǵan keıip tanytyp, basqa balalarǵa da qarap, ótirik istep turynyz...» dep úıretken. V.Saveleva onyń aıtqanyn buljytpaı oryndapty. Bul suhbattyń túpnusqasy Jánibek Jumaǵulovta jene Jánibektiń zańdy ókili men — Qymbat Dosjanda”, - delingen jazbada.
Odan bólek, halyq Belgııadan kelgen týǵan anasyn izdep, Qazaqstanǵa kelgen Jánibektiń týystary týraly da surap jatyr.
“… janashyr halyqqa aıtarym, qatelespesem, sol jyldary bosanǵan áıeldin 54-nen DNK materıal alyndy. Jánibektikimen eshqandaı áıeldiki sáıkes kelmeıdi. «Qalgan áıelder qaıda, olar nege tapsyrmaıdy?» degen saýal da oryndy. Oǵan keler bolsaq, «Ol áıelderdi tabý qıynǵa soǵyp tur, shetelge keship ketipti, bizde tergeýshi jetispeıdi..» degen syńdy túrli syltaý estımin polıııadan. Boljamdy ákesi tabyldy dedim, ol ras. Biraq ol kisiniń ózi bul ómirde joq, týǵan balalary DNK analız tapsyrýdan bas tartty, biraq, sol qaıtys bolǵan kisiniń týǵan baýyrlary bar, olar da bárin bilip otyr. Men tipti polıııa qyzmetkerimen arnaıy baryp jolyqtym, aıǵaıǵa basyp, ótinishimdi tyńdamady. Kezinde osy balalardy shetel azamattaryna usynyp, dollardy sanap alǵandardyń qazir uıqysy tynysh emestigine senimdimin. Bul oqıǵada aýdarmashy jalǵyz fıgýrant emes. Tergep-tekserý jumysy durys, ádil júrse, Astanadan jeke kóliken Arqalyqqa jetkizgenderden bastap, resmı laýazym atqarǵandardyń barlyǵy jaýap berýi tıis. Mine, bir jyl ótti, Jánibek ekeýimiz osyndaı nátıje kútip júrmiz. Osy bir jyl ishinde qanshama áıeldin taǵdyrymen tanystym. Biriniń de atyn atap nemese foto-vıdeosyn jarııalap jibergen joqpyn. Óıtkeni Qazaq medıasyna 40 jyl qyzmet etip kele jatqan men - jaýapkershilik degenniń ne ekenin bilemin. Dál solaı, Valerı aıtqan aýdarmashy kim, ol qazir qaıda turady, buryn qaıda jumys istedi, qazir qaıda jumys istep, qandaı qyzmet atkaratynyna deıin bilemin, Jánibek te biledi”, — dedi Qymbat Dosjan.
Ol anyqtalǵan aqparatty jarııalamaý sebebin de túsindirdi.
“Osy eldiń zańyna baǵynatyn azamat jáne Jánibektiń resmı ókili bolǵandyqtan, en bastysy, tergeý isine kedergi keltirmeıin dep áleýmettik jelige jarııalamaı otyrmyn. Haıp qýǵan bireý bolsam, jaıyp salyp qarap otyrmaımyn ba? Bala saýdasyna qatysy barlarǵa aıtarym, Jánibektiń shyndyǵyn ashyńyzdar, maǵan habarlasyńyzdar. Bizdiń qazirgi basty maqsat — balanyń týgan sheshesin tabý. Al bala saýdasyna qatysty máselemen tıisti organdar aınalyssyn. Jıyrma jyl turmaq, elý jyl ótse de, bala saýdasynyń júgi jeńildemeıdi-ay. Qazir Jánibek Ispanııada, qolyna túsken jumyska jegilip, túrli salada qyzmet etip júr. Týa sala týǵan anasynan, týǵan jerinen jyraq ketken ol qıyndyqqa ábden shyńdalǵan, ımmýnıteti myqty, biraq jadaıy onsha emes. Kúlse de, álemniń eń kórikti jerine saıahattasa da «Meniń sheshem kim?» degen suraqpen ómir súrip keledi. Balanyń keshi solaı batady, tańy solaı atady”, - dedi jýrnalıst.
