Kúni keshe Reseı Prezıdenti V. Pýtın Ýkraınanyń DNR, LNR, Zaporoje jáne Herson aımaqtaryn qosyp alǵanyn habarlady. Qoǵamdyq pikir jetekshisi, jýrnalıst Ońǵar Qabden aınalamyzda bolyp jatqan osyndaı saıası qaıshylyqtarǵa baǵa berip, qazirgi Qazaqstan múddesi jaıly sóz etti, dep habarlaıdy "Adyrna" ulttyq portaly.
“Herson, Lýgansk jáne Donek, Zaporoje óz tańdaýyn jasady. Bul aımaqtar Reseıge qosylýdy tańdap otyr. Biz adamdardyń tańdaýyna qurmetpen qaraımyz jáne qabyldaımyz. Dereý arada Kıev áskerı qımyldy toqtatyp, kelissózge kelsin. Biz kelissóz ótkizýge daıynbyz” dedi shimirikpesten. Men soltústik kórshiniń qadamdarynan qorqaıyn dedim. Biri Ýkraına biri Reseıdi jaqtap óz-ózimizben qyrylysyp otyrysymyz mynaý. Bizge shuǵyl arada ulttyq ıdeologııany túzý kerek. Ult bolyp uıyspasaq myna referendým bolashaqta bizdiń jerde ótedi, - dep jazdy jýrnalıst.
Osyndaı saıası bulǵaqtar dáýirinde ulttyq birlik, ulttyq múdde men qazaq arasyndaǵy aýyzbirshilikti kúsheıtý úshin ulttyq ıdeoloıgııa qajet ekenin eskertken jýrnalıst qazaqtyń basqarýshylyq qurylymdaryn jetildirip, berekeli jurtqa aınalý jaıyn erekshe atap ótti.
"Bas basyna bı bolǵan óńkeı qıqym, Minekeı buzǵan joq pa eldiń sıqyn" degen Abaıdyń sózin qaperde ustaıyq. Qazirdiń ózinde Omar Jálel degen bıimiz bar. Erteń Shyǵystyń óz bıi, Batystyń óz bıi bolsa. Sosyn, han saılap alsaq. Memlekettik qurylym qaıda qalady? Atyraý men Altaı arasyn jaılaǵan qalyń qazaqty bir maqsatqa, bir múddege jumyldyryp, berekeniń baıraǵyn jelbiretken berekeli jurt bolýymyz kerek. Altybaqan alaýyzdyǵymyzdy kim paıdalanbady? Saýsaqtyń ózi birikse ǵana judyryq bolady", - dedi avtor.
Jýrnalıstiń oımaqtaı oıyna: "Ne de bolsa Reseıdiń asyǵy túgendelip kele jatyrǵan sııaqty. Bul agressorlyq saıasat arty jaqsylyqqa aparmaıdy. Degenmen bárine daıyn bolýymyz kerek sııaqty. Ózimizdiń aýyzymyz bir bolýy kerek. Ony ádemilep uıystyratyn bir basshy kerek", "Ulttyq ıdeologııa deısiń-aý. Soltústik pen Ortalyq aımaqtar túgel orystanyp boldy. Ákimderi tanaýynyń astyndaǵyn kórmeıdi" dep pikir bildirdi oqyrmandar.
