13 qyrküiek künı Almaty qalasynda Qazaqstan Syrtqy ıster ministrlıgıne qarasty «Otandastar qory» kommersiialyq emes aksionerlık qoǧamynyŋ ūiymdastyruymen şeteldegı jäne Qazaqstandaǧy käsıpkerlerdıŋ qatysuymen «Otandastar» biznes-forumy öttı.
Atalǧan ıs-şaraǧa AQŞ, Austriia, Japoniia, İran, Qyrǧyzstan, Qytai, Malaiziia, Moŋǧoliia, Oŋtüstık Koreia, Özbekstan, Resei, Türkiia elderınen kelgen 50-ge juyq etnikalyqkäsıpker qazaqtar qatysty.
- Şetelde tūratyn 3 millionnan astam qazaq bar dep aitamyz. Olardyŋ arasynda ısker azamattar jeterlık. Solardyŋ ışınen bılım, öner, medisina, önerkäsıp, t.b. salalar boiynşa eŋ myqtylaryn şaqyrdyq. Forumǧa 12 elden kelgen otandastarymyz qatysyp jatyr. Almatyda tūŋǧyş ret ötıp jatqan «Otandastar» biznes-forumynyŋ maqsaty – Qazaqstanda tūryp jatqan otandas käsıpkerlerdıŋ basyn qosu, bır-bırımen tanystyru, bırge joba jasau. Tanystyru arqyly bır-bırımen bailanystaryn nyǧaitu.Sonymen qatar, şetelde jäne Qazaqstanda tūratyn käsıpkerlerdıŋ keŋesın qūru. Būl keŋestı jaŋa jobalardy talqylap, Qazaqstannan jäne şetelden investisiia tartu siiaqty mäselelerdı şeşu maqsatynda qūramyz - deidı, «Otandastar qory» kommersiialyq emes aksonerlık qoǧamynyŋ (KEAQ) prezident keŋesşısı Didar Bolat.
Forum ekı sessiiaǧa bölındı. Bırınşı sessiiada Qazaqstanǧa būryn köşıp kelgen qandas käsıpkerler «Qazaqstanda biznestı qoldau tetıkterı men täjıribesı» taqyrybynda söz söilep, öz täjıribelerımen bölıstı. Al ekınşı bölımde är elden kelgen qandas käsıpkerler atajūrtpen ıskerlık bailanystary turaly baiandady.
- «Otandastar» biznes forumynyŋ negızgı maqsaty – bızdıŋ etnikalyq qandastarymyzdy Qazaqstanǧa kelıp käsıp jasauǧa, käsıp igeruge, memlekettıŋ şaǧyn jäne orta biznesın damytuǧa özındık ülesın qosuǧa şaqyru. Sonymen qatar, bır-bırın qiyndyqtar men laifhaktarmen bölısıp, jıgerlendıru. Otandastar qory közdegen maqsattaryna jetıp jatyr dep oilaimyn – deidı forum qatysuşysy Dulat Tastekei.
Ūiymdastyruşylardyŋ aituynşa forum aiasynda aitylyp jatqan ūsynystar köp. Sonyŋ bırı «iQANAT» mektebı şeteldegı qandas balalardy oquǧa aluǧa daiyn ekenderın habarlady. Irıkteuden ötıp, jeŋımpaz atanǧan eŋ myqty balalrdy Qazaqstanǧa oquǧa alyp kelu josparlanuda.
- Ötken jyly jalpy Otandastar forumy ūiymdastyryldy. Biyl biznes forum ötıp jatyr. Kelesı jyly ǧalymdar konferensiiasyn ötkızu josparda bar. Jyl saiyn är baǧytty qamtu oida bar. Bıraq osy forumda qūrylyp jatqan käsıpkerlerdıŋ keŋesı endı jyl saiyn jinalyp tūrady. Osy jūmysty jalǧastyruǧa otandastar qory bar küşın salady – deidı Didar Bolat.
Merei Myrzaǧaliqyzy
«Adyrna» ūlttyq portaly
