Aýǵanstannyń Ózbekstandaǵy jańa elshisi taǵaıyndaldy, dep habarlaıdy "Adyrna" ulttyq portaly.
Tolonews málimetinshe, Aýǵanstannyń elshisi Abdýl Gafar Tıravı qyzmetin jaqyn arada bastamaq.
«Sońǵy úsh jylda Islam Ámirligi (Aýǵanstan) turaqty jáne kúshti rejım ekenin dáleldedi. Ýaqyt ótken saıyn aımaq pen búkil álem shyndyqty uǵynýda. Jaqyn arada Abdýl Gafar Tıravı Tashkenttegi Islam ámirliginiń elshisi retinde jumysyn bastaıdy», - dedi Aýǵanstannyń syrtqy ister mınıstrligi.
Elshi qyzmetine taǵaıyndalǵan Tıravı – etnıkalyq ózbek. Ol dıplomatııalyq mıssııanyń basshysy bolyp taǵaıyndalǵanǵa deıin Aýǵanstan Joǵarǵy sotynda zertteý departamentiniń dırektory qyzmetin atqarǵan.
2023 jyly Qazaqstan syrtqy ister mınıstrligi Astanada Talıban dıplomattary jumys isteı bastaıtynyn habarlaǵan. Osy aralyqta Qazaqstan Reseı sııaqty Talıbandy terrorıstik uıymdar tiziminen shyǵaryp úlgergen.
