Qytaıda qazaq ánderi áýeledi. Kórshi memlekettiń astanasy Beıjińde 30 qazaq áni ózge tilge aýdarylyp, jańa jınaq jaryq kórdi. Onyń ishinde Abaı Qunanbaev, Shámshi Qaldaıaqov, Altynbek Qorazbaev jáne Nurǵısa Tilendıevtiń shyǵarmalary bar, dep habarlaıdy "Adyrna" ulttyq portaly.
Qazaqstan Respýblıkasy, Syrtqy ister mınıstrliginiń habarlaýynsha, Beıjińde qytaı tilindegi tanymal qazaq ánderiniń alǵashqy aýdarma jınaǵynyń tusaýkeseri ótti. Aýdarmanyń avtory – jazýshy Ákbar Májıt. Qalamger osydan 2 jyl buryn Abaıdyń óleńderi men Qara sózderin de qytaı tiline aýdarǵan edi.
«Al án sózin aýdarý ońaı bolǵan joq. Óıtkeni sózdi maǵynasymen rıtmge keltirý mańyzdy» deıdi. Avtor bul aýdarmaǵa osydan 40 jyl buryn kiriskenin aıtady. Al Qytaı jurty qazaq ánderin burynnan súıip tyńdaıdy eken. Máselen, «Qarlyǵash» 1930 jyldardyń ózinde qytaı tiline aýdarylǵan.
Bul 30 ándi men byltyrǵy jyly Qazaqstan men Qytaıdyń dıplomatııa baılanystyń 30 jyldyǵyna arnaǵam. Sondyqtan 30 án taldandy. Biraq byltyr indet jaǵdaıynan ýaqytynda shyǵa almaı qaldy. Sondyqtan bıyl shyǵyp otyr. Budan keıin osyndaı mádenıet aýys-kıis bolyp jatsa, eki eldiń halqynyń kóńili toǵysyp jatsa, osy máńgi irgeles elmiz, eki eldiń dostyǵy, bereke-birligi bitpeı, osylaı jalǵasa berse deımin, - deıdi jazýshy, aýdarmashy, II dárejeli Dostyq ordeniniń ıegeri Ákbar Májıtuly.
Ákbar Májıtuly (1954 j. týǵan) – qytaı tilinde jazatyn az ulttary ókilderinen turatyn QHR-dyń kórnekti jazýshylarynyń biri. 1982 j. bastap Qytaı jazýshylar odaǵynyń múshesi, QHR Halyqtyq saıası konsýltatıvtik keńesiniń depýtaty bolǵan, úsh ret QHR Memlekettik syılyǵynyń ıegeri, II dárejeli «Dostyq» ordeniniń kavaleri, onnan astam kitaptyń, onyń ishinde Abaı shyǵarmalary aýdarmalarynyń avtory bolyp tabylady.
Ákbar Májıtulynyń aýdarmalary men shyǵarmashylyq izdenisteriniń arqasynda búgingi tańda qytaılyq oqyrmandar qazaq ádebıetiniń kórnekti klassıkteri men tanymal kompozıtorlardyń shyǵarmalarymen tanysa alady.
Is-sharaǵa qonaq esebinde Qytaıdyń memlekettik organdary, akademııalyq jáne shyǵarmashylyq zııalylary, qazaq dıasporasynyń ókilderi, sondaı-aq qytaılyq jáne qazaqstandyq BAQ jýrnalısteri qatysty.
"Adyrna" ulttyq portaly
