Europa Qytai elektromobilderıne köp salyq sala bastady. Būl turaly Eurokomissiia EO aumaǧyna Qytaidan kırgen elektromobil üşın sūralatyn salyq mölşerı artqanyn mälımdedı, dep habarlaidy “Adyrna” ūlttyq portaly kolesa.kz saityna sıltep.
Aqparatqa säikes, qazırgı tarif uaqytşa. Eurokomissiia 4 ai qosymşa keŋesıp, qaraşada bes jyl küşınde bolatyn jaŋa tarifterdı bekıtedı.
Qart qūrlyqtyŋ mūndai qadamǧa baruyna naryqtaǧy bäseke şarttarynyŋ bärıne teŋ emestıgı sebep boldy. Euroodaq byltyr Qytai avtoöndıruşılerı memleket qoldauynyŋ arqasynda jahandy jaulap jatyr dep küdıktengen. Jergılıktı öndıruşılerde ondai mümkındık joq. Olardyŋ tūtynuşydan aiyrylyp qalu qaupı joǧary ekenın eskergen Eurokomissiia jaǧdaidy qolǧa alu üşın joǧary salyq mölşerın bekıtu turaly şeşım qabyldady.
Qūzyrly organdar tergeu jürgızıp, Qytai bilıgı qai kompaniiaǧa qandai kömek berıp otyrǧanyn anyqtaǧan. Salyq somasyn da soǧan säikes belgıledı. Mäselen, jekenıŋ qolyndaǧy BYD kompaniiasyna 17.4 % degen tarif engızse, Geely 19.9 % beredı, al basym bölıgı memleketke tiesılı SAIC üşın 37.6 % bekıttı. brendterdıŋ bırazy 20.8 % salyq töleidı.
Komissiia mälımdemede Şanhaida jasalǧan kölıkterın Europada saudalap jatqan Tesla-ny da atap öttı. Eger kompaniia jeke tarif engızuge qatysty däiektı şaǧym berse, oǧan bölek mölşerleme bekıtedı. Bıraq naqty tarifter küşıne engenın kütu qajet.
Keibır derek boiynşa jaŋa mölşerleme qoldanystaǧy 10 paiyzdyq salyqtyŋ ornyn baspai, sonyŋ üstıne qosylady eken. Demek, bırqatar Qytai kompaniiasy būrynǧydan bır jarym ese artyq salyq töleuge mäjbür bolady. Sala analitikterınıŋ esebıne süiensek, aspan asty elı elektromobil öndıruşılerdı qoldau üşın 230 mlrd dollardan asa qarajat jūmsaǧan.
