Aqtöbe qalasynda «Aqtöbe» jäne «Aqjar» dıni pansionattary jabyldy, dep habarlaidy «Adyrna» tılşısı.
Qalalyq prokuratura balalar pansionattary türındegı qaiyrymdylyq mekemelerın tekseru barysynda zaŋnama talaptary būzylǧanyn anyqtady.
«Pansionat tärbielenuşılerınıŋ jeke ısterın zerdeleu barysynda olardyŋ dıni ädebietterdı paidalanǧany, sonymen qatar, jeke ısterınde dıni jazbalary bar däpterlerdıŋ bar ekenı belgılı boldy. Is jüzınde mekemelerdıŋ qyzmetı olardyŋ jarǧylyq maqsattaryna qaişy keledı.
Qaiyrymdylyq mekemelerı qyzmetınıŋ dıni beiımdılıgı, balalar men tärbieşılerdıŋ saualnamalarymen de rastaldy»,—delıngen 21 mausymda taratylǧan habarlamada.
Odan bölek obektılerde sanitarlyq-epidemiologiialyq, ört, eŋbek zaŋnamasynyŋ talaptary būzylǧan.
Prokuratura mälımetınşe, balalardyŋ tiıstı bılım aluǧa, tärbielenuge jäne der kezınde medisinalyq kömek aluǧa qūqyqtary men bostandyqtary aitarlyqtai būzylǧan.
Qazırgı uaqytta sot Aqtöbe qalasy prokuraturasynyŋ talap-aryzy boiynşa 2 pansionatty tırkeuden şyǧaryp, taratyp jıberdı.
