اقتوبە قالاسىندا «اقتوبە» جانە «اقجار» ءدىني پانسيوناتتارى جابىلدى، دەپ حابارلايدى «ادىرنا» ءتىلشىسى.
قالالىق پروكۋراتۋرا بالالار پانسيوناتتارى تۇرىندەگى قايىرىمدىلىق مەكەمەلەرىن تەكسەرۋ بارىسىندا زاڭناما تالاپتارى بۇزىلعانىن انىقتادى.
«پانسيونات تاربيەلەنۋشىلەرىنىڭ جەكە ىستەرىن زەردەلەۋ بارىسىندا ولاردىڭ ءدىني ادەبيەتتەردى پايدالانعانى، سونىمەن قاتار، جەكە ىستەرىندە ءدىني جازبالارى بار داپتەرلەردىڭ بار ەكەنى بەلگىلى بولدى. ءىس جۇزىندە مەكەمەلەردىڭ قىزمەتى ولاردىڭ جارعىلىق ماقساتتارىنا قايشى كەلەدى.
قايىرىمدىلىق مەكەمەلەرى قىزمەتىنىڭ ءدىني بەيىمدىلىگى، بالالار مەن تاربيەشىلەردىڭ ساۋالنامالارىمەن دە راستالدى»،—دەلىنگەن 21 ماۋسىمدا تاراتىلعان حابارلامادا.
ودان بولەك وبەكتىلەردە سانيتارلىق-ەپيدەميولوگيالىق، ءورت، ەڭبەك زاڭناماسىنىڭ تالاپتارى بۇزىلعان.
پروكۋراتۋرا مالىمەتىنشە، بالالاردىڭ ءتيىستى ءبىلىم الۋعا، تاربيەلەنۋگە جانە دەر كەزىندە مەديتسينالىق كومەك الۋعا قۇقىقتارى مەن بوستاندىقتارى ايتارلىقتاي بۇزىلعان.
قازىرگى ۋاقىتتا سوت اقتوبە قالاسى پروكۋراتۋراسىنىڭ تالاپ-ارىزى بويىنشا 2 پانسيوناتتى تىركەۋدەن شىعارىپ، تاراتىپ جىبەردى.
